شكون أنا؟

أستاذ الثانوي التأهيلي.

هاد المبادرة في إطار الحق العالمي ديال المعرفة للجميع، و في إطار واحد العدد ديال المبادرات الشبابية لي تادعو إلى تنوير الشباب و توجيهو نحو القراءة و الثقافة بشكل عام و ذلك لأهميتها في بناء واحد المجتمع لي هو واعي و قاري و ملم بالمواضيع الكبرى لي كايخص أي شخص فالقرن الواحد و العشرون إكون عندو بها معرفة ولو بسيطة، من هاد المبادرات كاينة "مبادرة القراءة للجميع Initiative Lecture Pour Tous" لي كانت فواحد العدد من المدن و لي للأسف ضعافت و ربما تلاشات، كانتمنى تسترجع الأنفاس و يظهرو شبان جداد إقودوها من جديد، كاينة كذلك مبادرة "الفلسفة فالزنقة" لي حتى هي ظهرات فشي مدن و نقصات و مازالة ناشطة في مدن قليلة ربما. تانتمنى حتى هي تزيد تنتشر و تلقى دعم شبابي باش تستمر.

الهدف من المدونة هو تبسيط مفاهيم و أفكار فلسفية و علمية و فجميع مجالات المعرفة الإنسانية لي هي عالمية و لي في اعتقادي لازم على كل شخص اعرفها و اشتغل بهاد في حياتو اليومية. لأن العلم (ماشي الجهل) هو لي إقدر احسن من أفكارنا و تصرفاتنا داخل الأسرة ديالنا و المجتمع ديالنا.

في نظري تبسيط وتسهيل المعرفة يأتي في درجة تساوي إنتاج المعرفة. فإذا كانو العلماء و المفكرين و الفلاسفة الكبار كاينتجو أفكار في كل عصر، فأقل ما يمكن نديروه حنا (كأشخاص ناس عوام_من العامة) هو مساعدة اكبر عدد ممكن من الناس العوام الآخرين اتعرفو على هاد الإنتاجات العلمية الرائعة.

كانو ناس لي صراحة بموازاة اسهاماتهم فالعلوم و الفلسفة ساهمو بزاف في تبسيطها و شعبنتها (popularisation ولا vulgarisation)، و تأثرت شخصيا في هاد الباب بكل من برتراند راسل Bertrand Russell  و كارل ساغان Carl Sagan لي قدمو خدمات كبيرة للإنسانية (طبعا إلى جانب عدد كبير آخر من الشخصيات بحال برايان غرين و نيل ديغراس تايسون...).

فالمغرب عندنا شبان لي تايسهمو كثير في بناء واحد الوعي علمي و ثقافي جيد سواءا غير عبر الإنترنت او في الواقع او هما معا، منهم غنذكر المجتمع العلمي المغربي لي عندو مجلة علمية و موقع و فيديوات فاليوتيوب، نقدر نذكر راغب أمين لي عندو عدد كبير من الفيديوهات ولي هو غني عن التعريف في مجال المعلوميات ونذكر نجيب المختاري و مصطفى سويكة فبرنامجو اجي تفهمولكن للأسف كاينين شباب كثار لي استخدمو الانترنت وخصوصا يوتيوب في تمرير أفكار لا تفيد في شيء إلا في تعميق المفاهيم الخاطئة و لي للأسف تايتابعها واحد العدد كبير من الشباب.

علاش الدارجة المغربية؟ طبعا اختاريت الدارجة في إطار هاد المسألة ديال تبسيط و شعبنة الافكار العالمية الكبرى، الهدف هو استاطعو الناس لي عندهم مستوى دراسي و ثقافي ضعيف أو لي ربما عندهم مستوى جيد ولكن ماعندهم اهتمام بالمعرفة أساسا. إذا الهدف هو الناس لي عندهم رغبة في تطوير أفكارهم و الإطلاع على المزيد منها. طبعا الناس لي تايقراو كتب وتايحسو أنهم ماغاديش استافدو والو و باغين اقراو بالفصحى و تايقراو باللغات الأجنبية الاخرى فهم غير مجبرين باش اقراو هادشي لي هو موجه بالدرجة الأولى لناس ماكاتقراش نهائيا.

طبعا المبادرة مفتوحة في وجه جميع الناس لي تايتقسمو معايا نفس الأهداف و لي باغيين اساهمو بأفكارهم و كتاباتهم مرحبا.


راسلني على: abderrazak.baddou@gmail.com
أنا ماشي من لي كاترسل لو إميل و خاصك قرن باش توصل بجواب.

ليست هناك تعليقات:

إرسال تعليق