​شنو هو الفرق بين اليساري واليميني في السياسة؟


شنو هو الفرق بين اليسار واليمين في السياسية؟
http://www.dailyinfographic.com/wp-content/uploads/2012/08/leftright_US_1416.gif

السياسة والمسائل المتعلقة بالحكومة والحكم كيقيسو جميع النواحي ديال حياتنا اليومية، بالتالي غيكون من المفيد تكون عندنا  معلومات عليها وعلى المواضيع لي كدور فنفس المجال. فكرت ندير واحد السلسلة فهاد المجال وقلت بلي أهم واول حاجة خاص أي واحد باغي يفهم السياسة يعرفها ويقدر يتخيل أي خطاب ولا نظام سياسي هويقدر يصنفو واش يمين ولا يسار. 


كما كتعرفو هاد السلسلة (افكار خاصنا كلنا نعرفوها) كتعطي معلومات عامة فقط وموجهة بالاساس للناس العامة. أما لي كيقرا ويبحث راه مايحتاجش لها. قلت هادشي لأن مسألة التصنيفات labeling ماكتعكسش ديما الواقع لأن الواقع معقد بزاف ولكن باش نفهمو التعقيد غادي نبسطوه ونستعلمو هاد القضية ديال التصنيف categorisation ماشي labeling. المهم تقريبا أي إيديولوجية سياسية يمكن نصنفها واش يمين ولا يسار. هاد التصنيفات كتعتمد في الاعلام والتاريخ وحتى في العلوم السياسية. 

https://qph.fs.quoracdn.net/main-qimg-717503c8fd05f96cb46a829cf8b88446-c

إذن شنو هو الفرق بين اليسار واليمين؟ 

مصطلح اليسار واليمين بدا من سنة 1790 في فرنسا (المرجع 1 التحت) في وقت الثورة الفرنسية في مجلس النواب بحيث تقسمو النواب إلى لي جالسين في ليمن ولي جالسين في ليسر. لي على اليمين هما لي مع تبقى الملكية حاكمة  ومايكونش تغيير جذري في نظام الدولة. ولي كانو جالسين على اليسار كانو باغين تغيير يقضي على النظام الملكي وتأسس  جمهورية. (نفس المرجع) وهكذا بقى مصطلح اليسار في السياسة كيوصف الناس لي مع التغيير الراديكالي (الجذري)، ومصطلح اليمين كيوصف الناس المحافظين، لي باغين تبقى الأمور كيف ما هي.


وهكذا مع ظهور الإشتراكية والماركسية بداو لي باغين تقلب الآية ويوليو وسائل الإنتاج فيد المِلكية العامة عوض الملكية الخاصة كيتسماو اليساريين، أما الناس لي بغاو يحافظو على نفس الوضع كيتسماو اليٙمينيين. وهكا بقى المصطلحين كيتداولهم الكتاب والملاحظين ديال مجال السياسة. 

مع أواسط القرن العشرين بداو الماركسيين كيسميو أحزابهم السياسية بكل فخر بسميات فيها "اليسار" وبداو كيحاولو يوصلو افكارهم للمستوى العالمي: كتسمى بالاممية الاشتراكية. وكان اليميني بشكل عام هو أي واحد كان ضد هاد الفكر اليساري. 


فالدول الأخرى كان اليساري هو لي ضد الآثار المدمرة ديال الرأسمالية وكيطالب بمعالجة المشاكل المتعلقة بالبطالة وتوفير تغطية صحية وتكافؤ الفرص في التعليم والوظيفة وغيرها. أما اليمينيين على العموم كيطالبو بأن الدولة تقلل من التدخل ديالها في السوق وتحرر الاقتصاد(العجيب أن اليمينيين كيطالبو أن الحكومة تهز يديها وتحرر السوق وفي نفس الوقت كتطالب منها تفرض قوانين تجريم الحريات الفردية). المهم اليمنيين ديما مع الملكية الخاصة وان دور السلطات هي تحمي نفس القيم والوضع القائم.


التسميات كتختلف. اليساريين كيتسماو حداثيين أو تقدميين. فامريكا كيتسماو Democrats الديمقراطيين واليمنيين كيتسماو الجمهوريون، فالنگليز اليسار كيتسماو ليبراليين (رغم انهم ضد تحرير الاقتصاد ربما ليبراليين لأنهم مع الحريات الفردية لان مفهوم الليبرالية جا من ليبرتي liberté ولكن كيخص تجارة حرة ماشي الحرية الفردية) واليمين محافظين. 


كلما مشينا في اتجاه اليسار كنمشيو لليسار الراديكالي (المتشدد)، وكلما مشينا في اتجاه اليمين كنمشيو لليمن المتشدد. وكلما اقتربنا للوسط كنلقاو تيارات أقل تشددا. المهم فكل أقصى غتلقى تيار لي كيآمن أنه يمكن يهز السلاح باش يدافع على مشروعه السياسي. هاد القضية ربما بدات كتنقص. 


باش نزيدو نفهمو نشوفو التصور ديال اليمين واليسار لأهم المجالات في المجتمع. 

نبداو بدور الحكومة والسياسة الاقتصادية.

اليسار: الحكومة ولا الدولة خاص يملك وسائل الإنتاج وتحكم في الاقتصاد وتقنن السوق حسب مواردها الطبيعية والبشرية. يعني القطاعات بحال التعليم والصحة والنقل خاص تشدهم الدولة وتسيرهم. كيطالبو تكون الضريبة على الثروة والاغنياء وتكون قوانين اقتصادية صارمة.


 اليمين: كيشوفو أن الحكومة والدولة خاصها تخلي السوق حر وماتحكمش فيه، يعني خاص نخوصصو أكبر عدد من القطاعات الاقتصادية ويوليو الشركات هما لي متحكمين. (الرأسمالية). كايطالبو مايكونوش قوانين كثيرة على الاقتصاد ويخليو لي عندو فلوس وقدر يشري ويسثتمر يبالي. 

التغطية الصحية:

اليمين: ماخاصش الدولة دير التغطية الصحية خاص تكلف بها شركات ولي قادر يدير التغطية الصحية يديرها لراسو. كل واحد يداوا على قد جيبو.

اليسار: كيآمن أن الخدمات الصحية حق من حقوق أي مواطن وبالتالي خاص الدولة هي لي توفرها لجميع المواطنين بشكل متساوي.

الهجرة:

 اليسار: الهجرة حق من حقوق الإنسان وحتى لي ماعندوش الوراق من حقو يعيش فأي دولة خصوصا يلا كان قاصر وماعندوش سوابق. خاص نفتحو الحدود ونستافدو من المهاجرين لأنهم كيعاونو الاقتصاد.

اليمين: الهجرة كتأثر على الاقتصاد والمهاجرين كياخدو الوظائف لي غيخدمو فيها ولاد البلاد وبالتالي خاص نزيرو الحدود ونطردو لي ماعندهم الوثائق.


التعليم:

اليمين: ماشي ضد المدرسة العمومية ولكن خوصصة التعليم من الحلول المناسبة لي غادي تزيد بالمدرسة للقدام لأنها كتقدم خدمات أحسن. 

اليسار: المدرسة العمومية هي الحل وخاصها تبقى فابور وتكون فيها الجودة. المدرسة العمومية هي ركيزة أساسية للتنمية. ويلا كان التعليم الخصوصي خاص الدولة تراقبو وتفرض عليه يقري ولاد الفقراء.


الدين

اليسار: الأديان حرية فردية كل واحد حر يختار الدين لي بغى ويخلي الناس يختارو الدين لي بغاو. ماخص الدولة تدعم حتى دين، خاصها تبقى محايدة. وماخصاش تعطي امتيازات لمواطنين​على حساب مواطنين آخرين بناءا على معتقدهم ولا لونهم ولا لغتهم . التلاميذ خاص يتعلمو التفكير النقدي ونخليو لهم حق اختيار المعتقدات لي بغاو. 

اليمين: خاص الدولة ترعى الدين الرسمي ورئيس الدولة هو رئيس الديانة السائدة. وعموما كيطالبو أن الدين يدرس في المدارس ويطبق ولي أهان الدين ولا خرج منو يتحاكم. لأن بالنسبة لهم القوانين الخاصة بالحريات الفردية خاص تكون من الدين. 


الحريات الفردية:

اليمين: الحريات الفردية خاص تدخل فيها الدولة، والاختيارات خاص تفرضهم الدولة. وبالتالي خاصنا نفرضو واحد النمط ديال الاخلاق والسلوك في المدرسة والإعلام. هادشي علاش اليمين بشكل عام ضد العلاقات الرضائية (خارج الزواج) (رغم أنه نقدرو نلقاو أشخاص يمينيين كيديروها)، ضد الإجهاض، ضد المثلية الجنسية، ضد تحديد النسل، مع تعدد الزوجات، ضد تدريس التربية الجنسية، خاص الدولة تفرض اللغة والهوية الوطنية. 


اليسار: ماخصش ​الدولة تدخل في خصوصيات المواطنين، بالتالي المواطن من حقو يختار يدير علاقات مع الشخص لي بغى (يكونو راضيين وعاقلين ماشي قاصر)، الدولة مكتمنعش لي بغات دير الاجهاض (في اطار قانون)، مع تحديد النسل، مع تعليم الأطفال الثقافة الجنسية، مع الاختيارات اللغوية والهوياتية للمواطنين(الانفتاح على لغات وهويات العالم)، المهم مع كل الحريات الدينية والسياسية والاجتماعية. 


مسائل أخرى: 

اليسار: مع حماية البيئة (الأحزاب الخضر)، مع المساواة بين​ الجنسين، مع احترام حقوق الأقليات، ضد الحروب، مع تدريس الفلسفة والتفكير النقدي، مع الإبداع في الفنون دون قيود، مع حرية التعبير والرأي كيفما كان، ضد عقوبة الاعدام، حرية المعتقد، ضد تعدد الزوجات، مع حقوق الاقليات الجنسية والثقافية،  

 اليمين: اليمين فميريكان مثلا مكايآمنوش بمشكل البيئة وكيقولو ان ظاهرة الانحباس الحراري غير هدرة خاوية وانه ماشي سوقنا وماغاديش نقصو من الثلوث. اليمين كيتحفظ على الفنون وكيقول أنه خاص ضوابط أخلاقية يلتزم بها المبدع، الأقليات خاصها تلتزم بضوابط الأغلبية، حرية التعبير في حدود (هناك خطوط حمراء)، المساواة بين الجنسين فيها نظر (في الإرث مثلا)، الفلسفة مادام لا تعارض الدين، ضد تدريس التطور (تغييرو بتدريس "التصميم الذكي")، مع عقوبة الاعدام، ضد الاجهاض والعلاقات الرضائية...


حركات فكرية:

 نشوفو بشكل خاطف بعض الحركات الفكرية لي ظهرات من رحم كل تيار: 


اليمين: الرأسمالية، المكارتية (McCarthyism)واحد الحركة ضد الإشتراكية، بانت فالميريكان، جماعة جون بورش John Birch Society حتى هي من اليمين الراديكالي المتشدد لي ضد الاشتراكية،طالبان التاتشرية Thatcherism نسبة الى مارگاريت تاتشر، كانت رئيسة الوزراء فبريطانيا من حزب المحافظين، الشعبوية اليمينية populism  (تيار ضد النخبوية)، الامبريالية، الوطنية والقومية، التجارة الحرة، الاخوان المسلمين، القطبية، الوهابية، السلفية... 


اليسار: الاشتراكية، الشيوعية، النقابية، البلوريتارية ،  العدالة الاجتماعية، المساواتية egalitarianism، اللاسلطوية anarchy، الديمقراطية، التقدمية، حركات من أجل الحريات المدنية civil rights movements، الحركات النسوية، حركات ضد الحرب، حركات حماية البيئة، دولة العمال، الماركسية، اللينينية، الماوية، حركات تناهضد العولمة، العلمانية، حقوق الإنسان، حقوق المرأة، حقوق الحيوان، الحداثة ومابعد الحداثة السلامية pacifism، ...


المهم الحركات لي يمكن تنضوي تحت كل تيار من هاد التيارت كثار وكل حركة ذكرناها عليها نقاش كبير وكل حركة فيها تيارات كثار ومايمكنش نهضرو عليهم هنا. من الحوايج لي نقدرو نشيرو لها هي أن الأحزاب السياسية لي محسوبين على اليمين في دول الشمال خصوصا في أوروبا دارو تراجعات كبيرة وولاو كيقبلو عدد من الأشياء لي خاصة الحريات الفردية مثلا ولاو مركزين غير على الجانب الاقتصادي. مثلا فبريطانيا (حتى فدول أخرى)حزب المحافظين لي من اليمين قبل زواج المثليين وهادي من الحريات الفردية لي اليمينيين ضدها في أغلب الأحيان والأماكن. 


نشوفو دابا بعض المنظمات والهيئات والأحزاب لي يمكن نصنفوها تحت كل جناح wing. 


اليمين: في المغرب: حزب الاستقلال، حزب العدالة والتنمية، الاتحاد الدستوري، العدل والإحسان، التوحيد والإصلاح، حزب النهضة والفضيلة، دول اخرى: حركة النهضة الإسلامية (الجزاير)، حركة حماس (فلسطين)، حزب الحرية والعدالة (مصر)، حزب النور (مصر)، الحزب الديمقراطي المسيحي (فرنسا)، الجبهة الوطنية ديال مارين لوبان  (فرنسا)، الحزب الجمهوري GOP (الميريكان)، حزب المحافظين البريطاني، حزب حركة النهضة (تونس)، حزب الشعب (اسبانيا)...


اليسار: النهج الديمقراطي (المغرب)، الحزب الاشتراكي الموحد (المغرب)، حزب الطليعة الديمقراطي الاشتراكي (المغرب)، الجمعية المغربية لحقوق الإنسان، أطاك المغرب ، حركة مالي (المغرب)، الاتحاد الاشتراكي (المغرب)، منظمة​التحرير الفلسطينية، الحزب الشيوعي الجزائري، الحزب المصري الديمقراطي الاجتماعي، الحزب الاشتراكي المصري، فرنسا الأبية la France insoumise، حركة جميعا (Ensemble) بفرنسا، حزب العمال البريطاني، الحزب الديموقراطي الامريكي، حركة نداء تونس، حزب Unidos Podemosمتحدين نستطيع (اسبانيا)...


شخصيات معروفة من كل تيار عبر العالم.

 اليمين: جورج بوش، جون مكاين، دونالد ترامب،جون مارين لوبان، تيريزا ماي، ادولف هتلر، دايفيد كاميرون، رونالد ريگن، مارگاريت تاتشر، فرانسيسكو فرانكو، بينيتو موسوليني، أسامة بن لادن، مصعب الزرقاوي،  محمد مورسي، عبد الإله بنكيران، عبد السلام ياسين، سيد قطب، الخمايني، الفيزازي، حسن البنا،  أيمن الظواهري، علال الفاسي، يوسف القرضاوي، زغلول النجار، أحمد الريسوني...


اليسار: كارل ماركس، تشي جيفارا، فلاديمير لينين، ماوتسي تونغ، فيديل كاسترو، ليون تروتسكي، جورج اورويل، البرت اينشتاين، بيرتراند راسل، پابلو بيكاسو، مارتن لوتر كينغ جينور، بيرني ساندرز، نعام تشومسكي، تشارلي تشابلن، باراك أوباما، هوغو تشافيز، تيودور ادورنو، جمال عبد الناصر، الحبيب بورقيبة، عبد الرحمن اليوسفي، بن سعيد ايت يدر،  نبيلة مونيب، محمد عابد الجابري، كارل ساغان، عبد الرحيم بوعبيد، شكري بلعيد، المهدي بن بركة، علي يعتة، ايت الجيد بنعيسى، سعيدة المنبهي، عمر بن جلون، أحمد عصيد ...


المهم الموضوع ماشي سهل، نتمنى يكون ارضية لكم وتعاودو تبحثو فيه... 

https://cdn-images-1.medium.com/max/620/1*sCSTjEbiNb67uWzDOHbP4A.png

فين كتصنفو راسكم وعلاش؟ 


  ماتنساوش تبعوني فلفايسبوك  وبارتاجيو مع ناس خرين
 https://www.facebook.com/abaddoucom


المراجع:

  1. Rodney P Carlisle. Encyclopedia of Politics: The Left and the Right. Vol 2. 2005
  2. https://www.diffen.com/difference/Left_Wing_vs_Right_Wing
  3. https://en.wikipedia.org/wiki/Right-wing_politics
  4. https://en.wikipedia.org/wiki/Left-wing_politics
  5. https://www.quora.com/What-is-the-difference-between-the-left-wing-and-the-right-wing-What-is-the-difference-on-a-basic-level-and-on-a-hardcore-politician-level
  6. https://en.wikipedia.org/wiki/Left%E2%80%93right_political_spectrum

ليست هناك تعليقات:

إرسال تعليق