شكون هو أول فيلسوف؟

بشكل عام حنا البشر تايعجبونا معلومات بحال شكون هو أول فيلسوف و شكون هو مخترع الراديو ولا الكاميرا ولا أي حاجة، ربما لأن الدماغ تايعجبو اعقل على معلومات بسيطة وقليلة، وربما لأن المجتمع تايعطي أهمية كثر لبحال هاد المعلومات خصوصا لأنها تاتجي في المسابقات الثقافية وفي أسئلة التحدي؛ ولكن (للأسف) فاش تاترجع تقلب على بحال هاد المعلومات تتلقى أنها ماشي بالسهولة لي كنا تانعتاقدو. وهاد المسألة ديال شكون هو أول فيلسوف ماشي مختلفة. في الوقت لي تقريبا لي سولتيه على شكون هو أول فيلسوف غادي إقول هو طاليسThales، هادشي قريناه فالمدرسة ولكن فواحد السياق لي غادي نذكروه، ولكن فالوقت لي نقدرو نعقلو على شكون هو أول فيلسوف، إقدر نكونو ماتانعرفو حتى حاجة آخرى على الفلسفة ديالو ولا على الفلسفة بشكل عام. هادشي علاش خاص ضروري نحددو شنو تانقصدو بأول فيلسوف؟

قبل ماندخلو الموضوع خاصني نقول أنه كما سبق لي ذكرت في التعريف بهاد المبادرة أن هاد المقالات لي تانكتب موجهة بالأساس للناس العامة و الهدف هو نعطيوهم فرصة اتعرفو على مواضيع لطالما كانت حكر على المتخصصين و المثقفين. لهذا هاد المعلومات كلها غير باش نخلقو الفضول عند الناس لربما إمشيو إقراو وإتوسعو فيها أكثر.

ملي تانقولو أول فيلسوف خاصنا نعرفو السياق ديالها، و أول حاجة خاصنا نعرفوها هو أن الفلسفة بالشكل لي تانعرفوها به دابا بدات  في اليونان (الإغريق). ملي تانقولو اليونان تاندخلو فيها حتى المستعمرات لي كانت تحت الحكم ديال الإغريق منها ملطية -Miletus- و أيونيا -Ionia- لي دابا فتركيا و إيليا -Elea- لي فجنوب إيطاليا دابا وجزيرة كريت -Crete- و غيرها من المناطق لي كانت يونانية--كانت ديك الساعة الموضة ديال الدولة-المدينة: كل مدينة مستقلة وعندها حاكم ولكن كانت تتحالف. و اليونان طبعا كانت بزاف دالحضارات حداها --كان لي عاصراتها و لي قبل منها--  بحال الحضارة المصرية، الفرس، الحتيون (Hittites)، البابليون،  السومريون و غيرها، هاد الحضارات كلها قدمات بزاف للإنسان ولكن حتى اذا كانو فيها شي فلاسفة فماوصلوناش، وملي غادي نهضرو على طاليسThales غادي نشوفو أنه كان في مصر و ربما تعلم من تما ما تعلم. المهم رغم أن هاد الحضارات لي ذكرنا ماشي بعيد تكون كانت عندها الفلسفة بشكل من الأشكال، فاليونان هي مهد الفلسفة كما تنعرفوها. وملي تانقولو أول فيلسوف تانهضرو على اليونان ولي جا من بعدها. وهاد الصفة ديال "أول فيلسوف" كان أرسطو، لي جا من بعد شي 300 عام، هو لي غادي إعطيها لطاليس.

الحاجة الأخرى لي خاصنا نعرفو هي أن مصطلح "فلسفة" ماكانش قبل اليونان _هادشي علاش قلت ممكن إكون كان شي تفكير بالشكل لي تسمى من بعد بالفلسفة_  و حتى فزمان طاليس بحيث الفلاسفة لي كانو فالعصر ديالو ماكانوش تايتسماو فلاسفة؛ كان سماهم أرسطو بالفزيائيين physiologoi و لي جات من كلمة physis لي تاتعني الطبيعة باليونانية، باقي تانسميوهم الفلاسفة الطبيعيين ولا فلاسفة الطبيعة natural philosophers،(غادي نشوفو علاش)، وبشكل عام تايتسماو فلاسفة ما قبل سقراطPre-Socratic Philosophers (داخلين معهم الفيتاغوريون و السفسطائيون). وربما أول واحد استعمل كلمة فلسفة -philosophia- ولي تاتعني حرفيا 'حب الحكمة' أو 'صديق الحكمة' هو فيتاغوراس Pythagoras، و فيتاغوراس و رباعتو (الفيتاغوريون) غادي إجيو مباشرة بعد هادو لي بداهم طاليس وقلنا سماوهم الناس من بعد بفلاسفة الطبيعة.

شنو خاصنا نعرفو علهم؟ باش كانو معروفين؟ شنو هي أفكارهم؟ كيف كان التفكير قبل منهم؟ قلبو على الأجوبة... وتسناو الموضوع جاي لي غانهضرو عليهم بشوية ديال التفصيل.

بارتاجيو وباش اوصلكم الموضوع الجاي دخلو للصفحة: http://www.facebook.com/abaddoucom


المراجع: A History of Western Philosophy - Bertrand Russell . 1945

هناك 3 تعليقات: