انا و لافاك 1

انا و لافاك 

فاش كنت تانقرا فالباك كنت متأكد أنني غادي نكمل قرايتي فلافاك هادشي لي خلاني ماندفع لحتى معهد ولا مدرسة واخا كانو الزملاء ديالي ديك الساعة كاملين تايقولو أن لافاك غير مضيعة للوقت) واخا كلهم كملو فيها قرايتهم فالاخير( خصوصا لأن ملتقى الطالب ديك الساعة تايخليك تحس بهاد الأمر حيتتاتلقى الخيمة الخاصة بالجامعة خاوية و مافيها حتى واحد تسولو ! فالوقت لي تاتلقى المعاهد والمدارس الخاصة جايبين بنات زوينات وملصقات ومجلات وتايشرحو لك بواحد الاهتمام تتولي شاك فراسك واش انا مهم كاع تال هاد الدرجة؟ المهم فاش تايقولو لك المبلغ السنوي تتعرف راسك ماشي ديال تما واخا تايقولوه بواحد الحنان...’’ماشي بزاف غير 30 مليون ‘’. بالنسبة لي ديك الساعة (وحتى دابا) بحال 30 بحال 10 بحال 5. المهم "لايمكن".

​المهم قريت فلافاك وتخرجت. ولكن واخا هكاك كاينين حوايج بزاف لي تاتخليوني نشوف لافاك بواحد النظرة سوداء. وهاد الحوايج ماكانوش تايبانو ليا ديك الساعة امكن حيت كنت داخل المايتريكس (بوغطاط) وكنت تانقول راه المكتوب وراه هادا هو المصير ديالي، وعلى أي ماكان عندي فين نمشي أصلا واخا نبغي خصوصا ملي تاتشوف طلبة تايمشو ضحايا حيث وقفو ضد الظلم. وأنا متأكد باقي ناس (وتنعرفهم) تايعانيو دابا فلافاك. ومن هاد الحوايج لي باقين هو تصرفات بعض الأساتذة. ها لي كتب شي كتاب  (نقلو من هنا وهنا)  وتايتغنا به كل صباح وعشية،​وفاللخر تايقول، بوجه صحيح، لي بغا اشريه نجيبو له و راه الامتحان غادي اتحط من الفصل كذا منو. طبعا كنا تنفكرو غير نجحو واخا ندبرو على هاد خمسين درهم ديال هاد الكتاب وخا تاتلقى الكتاب ماعندو حتى علاقة مع المادة، ماشي مشكل لأن أصلا قليل فاش تانقراو داكشي لي تايكون فعنوان المادة واصلا المادة براسها ضيموضات. و بعض المرات تاتبقى تقرا شي حوايج العام كامل (ولا 3سنين كاملة) حيث تاتعجب هاداك الأستاذ ولا حيت هي لي عندو معاها. 

وخلاص دابا مع الماستر تايشدو فيه لعاقة صحيحة تايجيو 4 ديال الأستاذة و تايقريو 12 مادة تايقسموها بيناتهم تاتجيهم 4 المواد الواحد. و كل مادة فواد، تاتجي للحصة و تتلقى راسك تاتقرا داكشي لي قريتي فالاجازة غير دابا وليتي ماستر ولكن السمية ديال المادة والأجواء مبدلة شوية (غير شوية). والمشكلة إلى ماعجبكش هادشي وقررتي ماتبقاش تجي (زعما تقرا فالدار وتكون راسك) غادي إشطبو عليك و خا هاد القضية مابقاتش حتى في الثانوي: التلميذ في الثانوي ماشي مشكل اتغيب غير مايفوتش شهر ولكن الماستر لا مايفوتش 3 حصص. فكرت علاش زعما؟ لقيت أنه تقدر تزكل شي حصة من داكشي لي كنتي قريتي فالاجازة لانه ضروري تعاود تقراه الوقت والزمان هادا. وفكرت عاوتاني ولقيت بلي الثانوي ماشي مهم. من بعد لقيت بلي حسن ماتفكرش كاع. 
ولكن واخا هكاك تاتشوف حتى تعيا تاتقول اللهم إجي لبروف إعاود إقريكم داكشي ديال ليصونص وتحاجيو شوية ولا مايجيش كاع. حيث هادي ولات موضة: تايشد لبروف 4 ديال المواد وتايبقى إتغيب (مسكين معذور لأنه تطلع له داكشي دليصونص فراسو) تال الحصة ماقبل الأخيرة وتايقولك المهم الامتحان الحصة المقبلة. ماكاينش لي اقول لا حيث اولا غادي ادير راسو في مواجهة مع دكتور قدو قداش ثانيا باغي غير اكمل ويشد "الكارتونة" ماطالعاش ماطالعاش.

المهم نهار الامتحان تايتحط لك واحد السؤال! لي زوين فهاد السؤال هو منين ما جيتيه غادي تقيس الجواب تقدر تهضر على الفيتنام و لا بانما (ولكن اهم حاجة هي تهضر على إدوارد سعيد). في الامتحانات كل بروف عندو طريقة كاين لي تايبغي بضاعته كما باعها بخمسين درهم إلى لقيتي تزيدو شي حاجة ديال التملق ولحيس الكابة غادي اكون في صميم الجواب. شي وحدين تايبغيوك تكون مطيع وما تعارضش داكشي لي تقال لك. وكاين لي غير كتب مع راسك حيت أصلا ماغاديش اقراه.

أهم حاجة خاصك تعلم فلافاك هو أنك ماتفاجئش نهار النتيجة. أصلا تاتكون عارف شحال غاتجيب من خلال واش شريتي لكتاب، واش تبلحستي بما يكفي، واش جلسي فالطاولة الأولى، واش تاتجي فآخر الحصة تقول الأستاذ تبارك الله عليك الحصة زوينة واستافت بزاف، واش هزيتي الكرتابل للأستاذ شي مرة حتال طوموبيل ودرتيه له فلكوفر، واش بنت ولا ولد إلى كنتي بنت من آشمن نوع، واش من القوارض ولا آكلة اللحوم... المهم تاتعرف النتيجة. وماتعجبش إلى لقيتي 0 ولا absent لأنك تقدر تكون حاضر جسديا ولكن مافيكش المعايير لي قلنا قبل. 

هاد الموضوع تنشر فجريدة المسار الصحفي عدد 186

هناك تعليق واحد:

  1. كنتمنا نعيشو شي يامات من حياتنا فلافاك على الرغم من أنني كنشوفو بواحد النظرة سوداء من دابا . كيفما قلتي ( مضيعة للوقت) داكشي علاش أغلبية التلاميذ مكيحددوش الوجهة ديالهم بكل إرادة . و المغلب ديالهم أيضا كيوقفو عند الباك و مكيكملوش . لمهم الله يعاونا و يعاون جميع الطلبة و التلاميذ المقبلين على لافاك .

    ردحذف