شنو الفرق بين العلوم الانسانية و العلوم الطبيعية؟

شنو هي العلوم الانسانية 



اول حاجة تا نلاحضوها هي ان العلوم في صيغة الجمع هادا تايعني انها واحد المجموعة ديال العلوم. باش نفهمو شنو هي العلوم الانسانية غادي اخصنا نقارنوها مع العلوم لي ماشي انسانية. و هاد القضية ماشي ساهلة لان جميع العلوم تايستافد منها الانسان، ولكن بشكل عام المتخصصين تايديرو في مقابل العلوم الانسانية Human Sciences العلوم الطبيعية Natural Sciences.


 العلوم الطبيعية ساهلة شوية في التعريف ديالها: هي كاع العلوم لي تادرس كل ما هو مادي/ فيزيقي/ فيزائي فقط. تادرس الحوايج لي ما عندهاش الوعي (ما عارفاش راسها كاينة). ولكن المشكل هو ان كاينة علوم من هاد العلوم الطبيعية (بحال الطب و البيولوجيا) تادرس حتى الانسان ولكن تادرسو من الناحية الفيزيولوجية فقط: اعني تاتعامل معاه بحالو بحال كاع الحيوانات و النبتات. اعني واخا تادرس الانسان تادرس كيفاش تايخدم الجسد و مناش تايتكون. و ملي تانتجاوزو هاد المجال و ماتانبقاوش فالعلوم الطبيعية ملي تاندرسو التركيبة ديال الدماغ مثلا و كيفاش تايخدم و شنو هما الباحات لي فيه و العروق الدموية لي فيه و الخلايا و كيفاش تاتنتقل السيالة من خلية لخلية راه حنا باقين فالعلوم الطبيعية ولكن ملي تاندخلو للنفس و الامراض النفسية مابقيناش فالعلوم الطبيعية و لينا فلعلوم الانسانية، شفتو ان صعيب نحددو فين تاتسالي العلوم الطبيعية و فين تاتبدا العلوم الانسانية. هاد النقاش باقي فالوسط العلمي و ديما غادي ابقى لان العلوم الطبيعية ديما تاتدخل بجديد في المجال النفسي و سيكوسوماتي psychosomatic. 

 امثلة ديال العلوم الطبيعية هي الفزياء، الكمياء، البيولوجيا، الجيولوجيا، علم الفلك، علم الكون، علم المناخ ... كل واحد من هاد العلوم فيه بزاف دالعلوم مثلا الفزياء فيه الجيوفيزياء، البصريات، الميكانيكا، الفزياء النووية، الفزياء الرياضية و غيرها...

العلوم الانسانية باختصار هي العلوم لي تاتركز على السلوك الانساني اعني على التعامل مابين الافراد و مع المؤسسات العمومية. و هاد العلوم تاتسمى علوم لانها تاتستعمل الطرق العلمية باش تدرس هاد السلوكات. إعني عن طريق الملاحظة و تاتحاول تنتج . نظريات و قواعد علمية لي تفسر و تنبأ بأي سلوك انساني، كما تدير العلوم الطبيعية مع الظواهر الطبيعية. و باختصار اكبر الى كانت العلوم الطبيعية تادرس الظواهر الطبيعية فالعلوم الانسانية تاتحاول تدرس الظواهر الانسانية. ملي تانقولو الظواهر الانسانية تانقصدو بيها التجارب والأنشطة والبنى واللمنتوجات المرتبطة بالبشر. 

فالوقت لي تاتدرس العلوم الطبيعية الانسان كشكل فيزيقي تاتشوفو العلوم الانسانية من الجوانب التعبيرية meaningful لي ماكايناش عند الكائنات الاخرى بحال التعاملات الاجتماعية و التجارب والأفكار والنوايا والمواقف والفكاهة  و اي حاجة تاتميز الانسان بشكل عام الانسان تايتميز باللغة و الابداع و الابتكار  و العقل (التفكير المنطقي في مقابل الغريزة) و حرية الاختيار (الى حد ما). 

و اهم العلوم لي تادخل ضمن العلوم الانسانية هي جميع العلوم الاجتماعية و الانسانيات بحال التاريخ، علم الاجتماع، الانتروبولوجيا، و علوم الاقتصاد التربية والتعليم و الجغرافيا القانون و اللسانيات و العلوم السياسية علم النفس و   الحفريات و الديموغرافيا و غيرها كثير...

شنو تايمييز العلوم الانسانية على العلوم الطبيعية؟

 هاد السؤال هو موضوعنا المقبل باش اوصلكم دخلو لهاد الصفحة



لي بغا يزيد اطالع ها هما المراجع: 






هناك 4 تعليقات:

  1. حاجا زوينة نلقاو شي حد يكتب بلغة يفهماها عامة المغاربة و يكتب على مواضيع أغلبية الناس مازال تالفين فيها
    تحياتي أستاذ بادو

    ردحذف
  2. معلومات زوينة ومفيدة جدا هكا الواحد اقد احيد تلبس لعند بزاف ديال هدي علوم علمية و هدي علوم أدبية كيفاش وشنو الفرق. ..شكرا جزيلا على هاد المعلومات القيمة...

    ردحذف
  3. شكرا لكم بزاف ... مرحبا بأفكار ديالكم

    ردحذف
  4. أزال المؤلف هذا التعليق.

    ردحذف