امتى ظهرات الكتابة و فين؟

كاينين مفكرين لي تايعتبرو أن الكتابة هي أعظم اختراع دارو البشر على وجه الأرض لأن كون ما الكتابة حتى حاجة من هاد التقدم العلمي و التكنولوجي لي وصل له العالم دابا ماغاديش اكون. اذن الكتابة لعبات أكبر دور فتاريخ البشرية.

ملي تانقولو الكتابة شنو تانقصدو بها؟

الكتابة هي واحد الوسيلة لي تاتساعد الإنسان اتواصل مع انسان آخر عن طريق رموز و علامات امكن تكتب ولا تنقش. وهاد الوسيلة تاتعاونا أننا نوصلو أفكارنا وأحاسيسنا للناس آخرين غير بالكتابة وخا نكونو متباعدين فالزمان و المكان. بمعنى نقدر نعرف أفكار ناس لي بعاد عليا و لي ماتو هادي سنوات. الكتابة ماشي لغة، ولكن واحد الوسيلة تقنية لي تاتعطيني الإمكانية باش نحول اللغة إلى رموز و علامات لي الناس لي عارفين هاد العلامات اقدرو إفهمو شنو بغيت نقول .

امتى ظهرات الكتابة وفين؟

أغلب الناس تايبغيو جواب صغير و مختصر على الأجوبة بحال هادي، للأسف ماشي ديما سهل تعطي جواب فيه جملة. لأن الإنسان القديم خلا بزاف ديال العلامات والرسومات في الكهوف و فالصخور لي ماعرفناش واش نحسبوها لغة ولا أشكال فنية.


أول حاجة تقدر تحسب أنها كتابة هي أدوات صغير ديال الطين كانت تاتستعمل في الحساب، ظهرت في حوض البحر الأبيض المتوسط تقريبا 8000 عام قبل الميلاد و بقات تاتستعمل بشكل متداول أكثر حوال 4000 سنة قبل الميلاد كذلك. هادي قليل لي تايعتابرها كتابة لانها كما شفنا فالتعريف ماكانتنقلش لينا الأفكار و تخلينا نتواصلو مع الاخرين؛ كنت غير وسيلة لتسهيل الحساب.
الصورة 1
ولكن أقدم كتابة هي لي تكتشفات في ما بين النهرين--نهر دجلة والفرات-- (كانت تاتسما السومر ديك الساعة --العراق دابا) و كانت فيها وحدة من أهم الحضارات الإنسانية القديمة --الحضارة السومرية. هادشي كان تقريبا شي 3200 عام قبل الميلاد  (يعني 5200 هادي). هد الكتابة كنت على شكل مايسمى ب بيكتوغراف (pictogramme و pictograph ) و لا ايديوغرام (ideogram )  لي هو رسم صغير عندو معنى معين. لاحظ الصورة 2.

الصورة 2

هاد الرموز لي غادي اتحولو من بعد إلى كتابة مسمارية (لاحظو الصورة 3)  و لي كانت تاتكتب في لوحات ديال الطين، هاد الطريقة تستعملات تقريبا حوالي 3000 عام قبل الميلاد في بين النهرين ديما.
الصورة 3


هادا جواب تقريبا متفقين عليه أغلب الدارسين. و هاد اللوحات ديال الطين باقين موجودين فالمتاحف.

ظهرات الكتابة في بلايص مختالفين و ربما بشكل منفصل. فالصين مثلا ظهرات اول كتابة فعهد واحد  السلالة كاتسمى شانغ ما بين 1600 و 1000 عام قبل الميلاد. شوفو الصورة 4
الصورة 4

هادي الكتابة الفنيقية بانت حوالي 1200 عام قبل الميلاد و كانت فيها 22 حرف. الصورة 5
الصورة 5

هادي كاتسما "حجرة روزيتا" تنقشات تقريبا سنة 290 قبل الميلاد و تكتشفات في 1799 و فيها 3 ديال اللغات حدا بعضياتهم و لي هي الهيروغليفية و "الدارجة" المصرية القديمة و اليونانية. الصورة 6
الصورة 6

ليست هناك تعليقات:

إرسال تعليق