بغيت نتعلم لونكلي ولكن ...3

نكملو على الخصوصيات لي تايخليو لونكلي تكون من بين أسهل اللغات في التعلم. كاينين بزاف ديال الحوايج.


1 أول حاجة تاتميز الكلمات فلونكلي هي أن أغلب الاسماء nouns ما عندهاش الجنس، إعني ماهي لا مؤنث لا مذكر، ماشي بحال العربية و الفرونسي و الدارجة و الاسبانية و اللغات الاخرى. فلونكلي ملي تانتعلم شي كلمة ما تانبقاش حاير واش مذكر ولا مؤنث. فاش تاتعلم أن computer هو الحاسوب ماتاتسوقش واش غادي تقول le ولاّla بحال الفرونسي، ولا هذا و هذه بحال العربية، إعني غادي تبقا كلمة computer هي هي فينما جات فالجملة. وهادشي تايمشي مع تقريبا جميع الكلمات من غير الكلمات لي تاتهضر على الاشخاص، بحال girl و boy و man  و woman و وحدين خرين قلال بحال actress و actor و waitress و waiter. من غير هادو كولشي ماعندوش الجنس، حتى المهن مثلا teacher و doctor و mechanic كلها بحال بحال، تانقولوها للاستاذ و الاستاذة و الطبيب و الطبيبة، و غيرها من المهن، من غير مهن لي تاتسالي بman و woman بحال businessman و businesswoman و cameraman و camerawoman. ولكن هادو حتى هما قلاااال. شفتو شحال نقص ديال التعقيد!!! فاللغات لاخرين ديما تاتبرزط واش le ولاّ la.

2 حاجة أخرى مهمة تاتخلي لونكلي ساهلة هي الصفات adjectives بحال good و bad و beautiful، حتى هي بحال الاسماء ما فيهاش مذكر و مؤنث، ماشي بحال العربية و الفرونسي و اللغات الاخرى، اعني تانقول good ونوصف بيها أي اسم سوا كان مذكر ولاّ مؤنث: نقول good boy ولاّ good girl. كما أن الصفات فلونكلي ماكتأثر بالجمع و المفرد، نقدر نقول good student ولاّ good students، هادشي مهم لان اللغات الفرنسية و العربية فيها بزاف ديال التغييرات لي خاص ترد ليها لبال فاش تبغي تدير صفة حدا الاسم. في العربية خلاص، خاص تشوف واش مفرد مذكر ولا مفرد مؤنث، ولا جمع مذكر و لا جمع مؤنث و الجمع حتى هو فيه بزاف ديال الامور. فلفرونسي حتى هي خاصك ديما دير l'accord ، اعني خاصك ترد لبال للكلمات و للضمائر و الجمع و المفرد و المذكر و المؤنث.

3 لونكلي مافيهاش كثرت الضمائر (I,you, he, she, it, we, they) هادو لي كاينين، في العربية كين ضوبل ديالهم (انا، أنتَ، أنتِ، أنتما، أنتم، أنتن، هو، هي، هما، هم، هن)، وyou تاتلخص أنتَ، أنتِ، أنتما، أنتم وأنتن، و فلفرونسي تاتلخص tu و vous. فنفس الوقت، تاتستعمل you بحال الضمائل المتصلة بحال كَ و كِ في بكِ، ولا معكَ، ولاّ كم و كن، بحال ف معكم ولاّ بكنّ. كما نقدرو نستعملو they بلاصة هما، هم، و هن و حتى مع الجماد.

الجمع فلونكلي أسهل مايكون!!! تقريبا جميع الكلمات تاتزيدهم S و هاهي ولات فالجمع! Boy> boys، girl> girls computer > computers، كاينين تغيرات قليلة و فكلمات قليلة لي تاتختالف على هاد القاعدة و لكن بالزربة تعرف لهم لان واخا استثناءات عندهم قاعدة.

4 و كما شفنا فالموضوع الاول (شوف هنا) لونكلي فيها 29% ديال الكلمات من أصل فرنسي و هادشي تايخليها تكون ساهلة للمغاربة لي عارفين الفرونسي. و لي ماعارفش لفرونسي غادي اتفاجئ انه غادي اقدر إتعلم لفرونسي بشكل أسهل ملي تكون عندو لونكلي (من تجريبتي الشخصية) لان لونكلي و لفرونسي تايشتاركو في مميزات كثيرة.

المهم هاد الخصائص كاملة تاتخلي لونكلي ساهلة بالنسبة لينا حنا بزاف. ولكن ما نساوش اللغات الأخرى...

المواضيع لي قبل:


  • بغيت نتعلم لونكلي ولكن... 1



  • ليست هناك تعليقات:

    إرسال تعليق