بغيت نتعلم لونكلي ولكن... 1

تقريبا جميع الناس عارفين أن لونكلي مهمة بزاف و لكن ماتايقدروش اتعلموها. كيفاش نقدر نتعلم الانجليزية بسهولة و علاش خاصني نتعلمها؟

علاش خاصني نتعلم لونكلي؟

جميع اللغات مزيان اتعلمهم الإنسان خصوصا اللغات الحية، ولكن الانجليزية عندها واحد المكانة عالمية كبيرة شي لي خلاها تكون أهم لغة في العالم. و الإنجليزية هي الأولى استعمالا في التواصل بين الشعوب المختلفة عبر العالم (ولكن أول لغة من حيث عدد المتكلمين هي الشينوية / الصينية لأن أصلا الصينيين تايشكلو ثلث ديال سكان العالم تقريبا) ولكن واخا هكاك الإنجليزية هي لولى استعمالا في التواصل في العلاقات الدولية (السياسية، الاقتصادية، الصناعة والتجارة و في الانترنت). جميع الدول من دون استثناء تايقراو لونكلي، لي ماعندون كلغة أولى عندو كلغة ثانية ولا ثالثة ...طبعا الحكومات غير جاو و بداو تايقريوها للمواطنين. لا. لأن الدول الاقتصادية الكبرى لغتهم الأولى هي لونكلي. و بالتالي باش حنا نكونو في مستوى هاد الدول الكبرى خااااصنا نقراو لونكلي.

مهم كاع ناس لي تعلمو لونكلي إلى سولتيهم غادي اقولو ليك أنها من أهم الحوايج في حياتو أنه تعلم الإنجليزية. لي عندو لونكلي تاتكون واحد الحاجة إيجابية كبيرة فحياتو الشخصية و المهنية في جميع المجالات: الطب، الهندسة، العلوم، التكنولوجيا، الأدب والثقافة. ..حتى السياسة و الفلسفة. .. حتى لي بغا اتعلم لغات البرمجة و تطوير المواقع والمنتديات و لي بغا اتعلم الإلكترونيك و لا اتعلم اصاوب برامج الكمبيوتر و الاندرويد. ... الترجمة سواء ديال النصوص ولا ديال الأفلام الأجنبية. ... لي بغا اتعلم التصميم والجرافيكس ولا اتعلم لسينما والفنون كاملين ... لي بغا اتفرج فأملام جداد... مهم الإنجليزية غادي تنفعك سواء كنتي خدام و لا تاتقرا ...صغير ولا كبير. ..

كيفاش نتعلمها؟ واش ساهلة؟ شنو لي ساهل و شنو لي صعيب فيها؟

أنا من طبيعتي إلى بغيت نتعلم شي حاجة تانبغي نعرف لاش تاتليق (هضرنا على أهميتها) و تانبغي نعرف شوية على الأصل ولا على التاريخ ديالها.

أي لغة وأي فكرة عندها واحد الأصل و واحد التاريخ. مهم التاريخ ديال لونكلي طويل و ماغاديش نفصل فيه بزاف (لي بغاه موجود في الكتب المختصة) ولكن تانشوف انه كاينين حوايج مهمة خاص نعرفوهوم على لونكلي باش إسهال علينا نتعلموها:

أول حاجة خاصنة نعرفو أن اللغات كاملين تايطورو و واخا ماكاينش واحد جاوب متفق عليه حول أصل اللغة ولكن كاين شبه إجماع على ان اللغة كانت وحدة و تفرعات مع مرور الزمن بحال واحد الشجرة لي غاديا تاتتكبر و تايكترو الأغصان ديالها. كلما نزلنا من الأغصان في اتجاه الجدر تانلقاو أشياء مشتركة. العلماء ديال اللغة صاوبو شجرة تقريبية ديال اللغات كاملين حسب الزمان والمكان( امتا بانت كل لغة و فين). مهم الإنجليزية كاينة في عائلة اللغات الاهندوأوروبية indoeuropean لي هو فرع كبير ديال الشجرة (فيها لغات أوروبا و شبه القارة الهندية و الفارسية) و في اللغات الأوروبية فيها أغصان كبار ومن أهمهم كاينة اللغات الجيرمانية و اللاتينية. اللاتينية فيها الفرونسي و الإيطالية و الإسبانية. .. و في الجيرمانية فيها الإنجليزية و الألمانية و الهولندية ... هادشي علاش تانلقاو كلمات و قواعد  تتشابه بين كل لغات كل غصن من هادو.
الإنجليزية تطورات مع الزمن و أترات فيها بزاف دلغات على مر الزمن. أول حاجة فالقرون بين القرن خمسة و عشرة كانو قبائل من المناطق لي تاتسما دابا سكيندينافية (السويد، الدنمارك خصوصا) تايهجمو على الجزر البريطانية و مع مرور الوقت استاطعو ابقاو فيها و اندامجو مع السكان لي كانو في بريطانيا لي هما
البريتسBrits و السكوتسScots و لا السلتيونCelts  بشكل عام، هاد المزيج لي تكون فهاد لبلايص عطانا مع مرور الوقت و مع دخول هاد القبائل لي كانت وثنية و لي تعايشات مع المسيحية لي كانت في النكليز و عطاونا واحد اللغة تاتسما Old English،  الانجليزية القديمة.

لونكلي بشكل عام تايقسمو التاريخ ديالها على ثلاثة ديال المراحل: old English و Middle English و  modern English.


الانجليزية القديمة Old English هي واحد الخليط ديال اللهجات ديال القبائل الجرمانية لي استقرات في بريطانيا من القرن 5 بعد الميلاد تقريبا، هاد الخليط غادي اتطور لواحد اللغة غاتسمى من بعد بالانكلوساكسونية، هاد اللغة غادي تمزج مع اللهجات ديال السلتيونCelts و تفوق عليها و حتى على اللاتينية لي كانت جابوها الرومان للنكليز قبل من القبائل الجرمانية. المهم أقدم كتابة بقات مكتوبة بالإنجليزية القديمة هي واحد القصيدة ملحمية مشهورة سميتها بيوولف و لي مامعروفش الكاتب ديالها. لي بغا اسمع كيف كانت الانجليزية القديمة إشوف هاد الفيديو 
قصيدة بيوولف




اللغة الإنجليزية المتوسطة Middle English  لي تاتحسب أنها بدات من الغزو النورمندي لي دارو ويليام الفاتح في سنة 1066. نورموندي كانت في شمال فرنسا تمكنات تهجم و تستعمر النكليز من القرن 11 تال النهاية ديال القرن 15. هما لي جابو النظام الفيودالي / الاقطاعي. و طبعا جابو معهم اللغة الفرنسية ديال ديك الساعة  (هادشي علاش تانلقوا عدد كبير ديال الكلمات فرنسية فلونكلي-- 10 ألف تقريبا)، أغلب هاد الكلمات عندها علاقة بالسياسة والحكومة و الكنيسة و القانون و العسكر: المجالات لي كانت خاصة بطبقة النبلاء. (هنا لي بغا اشوف لائحة ديال الكلمات لي اصلهم فرنساوي فلونكلي). أهم حاجة تكتبات و بقات باللغة الإنجليزية المتوسطة هو واحد الكتاب كتبو واحد سميتو جوفري تشوصرGeoffrey Chaucer و الكتاب سميتو حكايات كانتربري Canterbury Tales هادشي فالقرن 14.
نسب اللغات الي تشكلات منها الإنجليزية


الإنجليزية الحديثة Modern English  كاين لي تايقسمها للانجليزية الحديثة المبكرة و المتأخرة و لكن باش مانطولش غانقول أن الإنجليزية الحديثة بدات من القرن 15 لفوق. هنا وقع واحد التغيير كبير فلونكلي تايسميوه the Great Vowel Shift. فهاد الوقت بدات لونكلي تاتقعد بحيت اختارو لونكلي ديال لندن تكون هي الرسمية، بان شكسبير فالنص ديال القرن 16 و كانت ديك الساعة لونكلي وا خدات بلاصتها و تصاوب أول قاموس/ ديسيونير ديال لونكلي فسنة 1604.

لونكلي غادي تنتشر فالعالم مزيان ملي ولات النكليز إمبراطورية كبيرة بعد الثورة الصناعية. من تما لدابا بقات لونكلي مهمة و منتشرة في العالم كامل. و دابا تايستعملهل كثر من مليار ديال البشر. و خدات لكنات(accents) كثيرة و متنوعة أهمها ديال الميريكان و ديال بريطانيا. 
خريطة الإمبراطورية البريطانية في أوائل القرن العشرين


فالمقال المقبل نهضرو على شنو ساهل فيها وشنو صعيب و كيفاش نتعلمها بالزربة.

هناك 3 تعليقات:

  1. مقالك على مستوى عال من الأكاديمية والاحترافية ، مشكور السيد عبد الرزاق على هذه الإضاءات وموفق إن شاء الله في قادم المقالات . تحية

    ردحذف
  2. تنشكرك بزاف سي ميمون

    ردحذف