شنو هو التفكير النقدي ولاش تايليق؟



نقدرو نبداو هاد الموضوع بتعريف شنو هو التفكير النقدي،
مصدر الصورة
نشوفو التعاريف ديال المفكرين اللولين فهدا المجال، نبداو بروبرت إنيس

التفكير النقدي هو واحد التفكير لي هو معقول و منطقي و تأملي لي ضروري باش نقررو شنو نديرو و لا شنو نتيقو و لا نعتاقدو. ( لي بغا اقول هو أن التفكير النقدي مبني على تفكير منطقي و عقلاني و ضروري في أي قرار كما كان).  
ماتيو ليبمان: التفكير النقدي هو واحد التفكير لي تايطلب مهارات، و لي مسؤول و لي هو ضروري باش نقدرو نحكمو على اي حاجة بشكل موضوعي لان هاد التفكير تايرتكز على معايير و سياق و لي مهم انه تفكير مبني على التصحيح الذاتي. ( تايقصد ان التفكير النقدي واحد التفكير لي تايتبنا و تاتعلمو الانسان، وأنه تايخليك تكون مسؤول على قرارتك وأراءك، و تايخليك تعلم كيفاش تكون موضوعي و تناقش الافكار بناءا على أدلة علمة و ملموسة و داخل واحد السياق، و آخر حاجة هي أن التفكير النقدي تايخليك تبقا تصحح راسك و تعلم من أخطاءك باش ازيد تفكيرك اكون قوي). 

ريشارد بول: التفكير النقدي هو التفكير في التفكير ديالك فالوقت لي نتا تاتفكر باش تحسن تفكير ديالك. (بمعنى تاتبقى ترد البال للطريقة باش كاتفكر باش تشوف شنو لي ناقص باش تزيد تقويه).
مصدر الصورة
 

كل هاد التعريفات مزيانين و تايعبرو على شنو هو التفكير النقدي، لي أحسن هو تعاود تقارهم و تمعن فيهم مزيان، لان هادوك تعاريف ديال الناس لي متخصصين فالتفكير النقدي. و عارفين كل كلمة علاش ختاروها.

باش تايختالف التفكير النقدي على التفكري؟ التفكير النقدي هو التفكير فالتفكير ديالك. مثلا ملي تايسولك شي واحد على شي موضوع معين تاتقدر تجاوب من بعد ماتفكر و تعطيه أفكار، لنفرض أنه سولك على الرأي ديالك حول الزواج ولا الموت غادي تجاوبو. هداك تايتسمى التفكير (شيء عادي)، ولكن التفكير النقدي هو تفكر علاش أنا عندي هاد الافكار على هاد الموضوع و علاش متافق و لا مامتافقش مع هاد الحاجة، و بما أن غالب الاجوبة ديالك على هاد المواضيع تايكونو خلاصات و من تجارب، تتسول راسك علاش فكرت هاكا، و منين جاوني هاد الافكار، تصور كون كنت كدا كون كنت غانفكر كدا، شنو الادلة لي عندي على هادشي لي تانقول، واش انا صريح مع راسي ولا غير بغيت نهضر وصافي، كيفاش نقدر نتأكد من هضرتي، وشنو المعايير باش نقدر نعرف الرأى لي أكثر منطقي؟ 

التفكير النقدي تايخليك تبقى تفكر و نتا داير فبالك معايير ديال التفكير السليم، إما انني غادي نفكر فهاد الحاجة بشكل صحيح و لا غير صحيح. تاتقول فراسك واش هاد الادلة و لامثلة لي غادي نعطي دقيقة و عندها علاقة ولاّ لا و لاّ شوية؟ ملي تانقرا شي موضوع تانسول راسي واش أنا قادر نفهم مزيان ولا غير فهم سطحي؟ شنو خاصني باش نفهم مزيييان و علاش؟ ( الدقة فالمعلومة، الصلة بالموضوع، العمق: هادو من المعايير لي نقدر نعبر بهم التفكير ديالي. وباش نكون قادر نصدر أحكام وقرارات و خلاصات خاصني ندير فبالي هاد المعايير. 

الفكير النقدي في العمق ديالو هو واحد التفكير لي تايفكر فاي المشاكل الحقيقية اليومية. فهو التفكير فداكشي لي تدير و تاتعتقد أنه صحيح. تاهتم باصدار أحكام جيدة و صحيحة. هاد المشاكل لي قصدت بها هي مشاكل لي ماشي ديما عندها أجوبة جاهزة و لاّ عندها اجوبة وحدة. هادشي علاش خاص ديما مانزربوش نعطيو أجوبة قطعية من خلال الزاوية ديال النظر ديالنا. لأنا بحال هاد الاجوبة لي تاتجي من زاوية وحدة و بلا تفكير نقدي تاتكون شي مرات كارثية و مؤلمة بعض المرات. 

التفكير النقدي تايتبنا على طرح الاسئلة، طرح الاسئلة لي خاصها تطرح، اسئلة مزيانة، و تايعني اننا نلاحظو هاد الاسئلة لي خاصها تطرح. التفكير النقدي تايعني نحاول نجاوب على هاد الاسئلة عند طريق تمحيصها و تمريرها عبر معايير عقلية موضوعية. وهاد الطريقة ديال الجواب ماتاتعنيش انني نجاوب بالاجوبة لي متوارثة و سمعتها من قبل بلا ما نتأكد منها، ماتاتعنيش اجوبة لي تاتجي من الانطباعات ديالي حيت تاتفكري بشي حاجة ولا جاتني بحال واحد الحاجة تانعرفها، ولا نجاوب بأجوبة تاتوالم مع شخصيتي و لا قناعتي. و ماتاتعنيش نجاوب بأول حاجة تاتجي لدماغي. 

التفكير النقدي ماشي يوغا ولا تمرين ذهني. لا. هو تفكير لي تايوصلك لنتائج، هاد النتائج خاصها تطبق و تجرب و إلى عطات نتائج ايجابية مزيان، نستمر و ديما فطرح أسئلة جديدة، و تستمر الحلقة هاكا. 


ليست هناك تعليقات:

إرسال تعليق