شنو هي الفلسفة؟ و لاش تاتليق؟ 2 الوجود و المعرفة

الوجود و المعرفة

أول مرة ظهرو الفلاسفة كان فاليونان القديمة هادي تقريبا 2500 عام، و كان العالم المحيط بهم و الحياة اليومية ديالهم هي لي كانت السبب الملهم ديالهم باش اتفلسفو. كانو تايشوفو الارض و الاشكال الحيوانية و النباتية المتنوعة لي كانت كاتسكن فيها و الاشياء المحيطة بهم، الشمس، القمر، الكواكب و النجوم حتى هي؛ كيفما كانو تايشوفو الظواهر الطبيعية الاخرى بحال الطقس، الزلازل، و الكسوف. كانو طبعا تايلقاو تفسيرات لهاد الحوايج كلها-- ماشي بالطريقة الشعبية و التقليدية القديمة ديال الاساطير و القصص ديال الالهة ولكن بطرق خرى لي اكثر منطقية و عقلية. أول سؤال انشغلو به هاد الفلاسفة كان هو "مناش مكون/ مصاوب الكون؟"و هاد السؤال لي من بعد غادي إكبر و إولي "شنو هي طبيعة (كيف داير) هادشي لي موجود (أي حاجة كاينة فالوجود)؟

هادي هي المجال الفلسفي لي كانسميوه دابا الميتافيزيقا، و واخا عرفنا بزاف ديال الاشياء على هاد السؤال الاساسي عن طريق العلم الحديث و لكن باقين اسئلة ميتافيزيقية كبيرة ماعرفناش الاجوبة ديالهم بحال "علاش كاينة شي حاجة اوماشي والو؟" بمعنى علاش كاين الوجود عوض اللاوجود؟ وهاد الاسئلة صعيبة و الاجوبة ديالها ماشي بسيطة. 

و حيتاش حنا براسنا جزء من الكون، فإن الميتافيزيقا تاتحاول تعرف حتى طبيعتنا حنا البشر و تاتبغي تعرف بالخصوص شنو هو أننا موجودات واعية (موجودات= اشكال موجودة فالكون، واعية = عارفين اننا موجودين).  كيفاش تاندركو العالم المحيط بينا؟ واش الاشياء موجودة بمعزل عن (خارج) الادراك و الفهم ديالنا ديالنا؟ شنو هي العلاقة لي بين العقل و الجسد دياولنا؟ واش كاينة شي حاجة شي حاجة تقدر توصف انها روح أبدية؟ المجال الفلسفي لي مختص بالاسئلة الوجودية، لي سميتو الانطولوجي (Ontology)، كبير بزاف و تايشكل الاساس ديال الفلسفة الغربية. 

ملي الفلاسفة بداو تايحاولو اوزنو الافكار بشكل عقلاني ظهر سؤال اخر اساسي لي هو" كيفاش نقدور نعرفو؟" المجال الفلسفي لي كايهتم بالطبيعة ديال المعرفة و كذلك الحدود ديالها تايشكل الشعبة الفلسفية الثانية لي سميتها الابيستيمولوجيا (Epistemology). 

السؤال المركزي لي فقلب الابيستيمولوجيا هو كيفاش تانكتسبو المعرفة لي تانكتسبوها؟ بمعنى كيفاش تانقدرو نعرفو بلي راه تانقدرو نعرفو؟ واش شوية (ولا گاع ) المعرفة فطرية (تانتزادو بها) ولا تانتعلمو كولشي عن طريق التجربة؟ واش نقدرو نعرفو شي حوايج عن طريق استخدام العقل بوحدو؟ 

هاد الاسئلة كلها أساسية فالتفكير الفلسفي، وباش نقدرو نعولو على المعرفة ديالنا و التفكير العقلي خاصنا نديروها فالبال. خاصنا كذلك نحددو الحدود و المجال ديال المعرفة ديالنا و إلا ماغاديش نقدرو نتأكدو من اننا بالفعل تانعرفو داكشي لي على بالنا بلي تانعرفوه و بلي راه ما "تخدعناش" بالحواس ديالنا و تيقنا راسنا بلي عندنا معرفة؟ 



إعداد: عبد الرزاق بادو


المصادر المستخدمة:
The Philosophy Book. Big Ideas Simply Explained. London, 2011.

ليست هناك تعليقات:

إرسال تعليق