شنو هو التنوير؟ -- كانط

شنو هو التنوير؟


فهاد المقال الأفكار خديتها وترجمتها من واحد المقال (ماشي المقال كامل)  معروف ديال ايمانويل كانط ولي كيجاوب فيه على  هاد السؤال ديال شنو هو التنوير ولا الانوار؟


هاد المقالة كتبها عام 1784، وكانت موجهة لواحد القس وتنشرات فواحد المجلة شهرية في برلين تحت عنوان Beantwortung der Frage: Was ist Aufklärung? نجاوبو على السؤال: شنو هو التنوير؟


كانط كيجاوب وكيقول: التنوير او الأنوار هو أن الإنسان يفيق ويتحرر من قلة العقل ديالو وعدم النضج ديالو لي فرضو على راسو. وهاد قلة العقل هي عدم القدرة ديال كل واحد فينا يخدم الفهم والعقل ديالو بلا مايحتاج لشي حد آخر. المشكل الكبير ديال هاد عدم النضج ماشي أننا حنا ماقدرناش نفهمو  لراسنا بوحدنا، ولكن المشكل هو أننا ماعدناش الشجاعة والجرأة باش نخدمو عقولنا بلا مانحتاجو لشي واحد يورينا. وبالتالي الشعار ديال الأنوار هو: Sapere aude! (هادي بالاتينية) كون قوي وشجاع واستعمل عقلك وطرح اسئلة باش تفهم. 


الكسل والعگز وغياب الشجاعة هما الأسباب لي كتخلي بزاف دناس مكيقدروش إتحررو من الخرافة واخا الطبيعة عطاتهم فرصة يكونو أحرار من كل توجيه خارجي. ونفس الاسباب لي دكرنا هما لي كيخليو ناس آخرين ينصْبو ريوسهم أوصياء على الآخرين. أنك تكون مرخي ومامسوقش حاجة مُريحة. مدام كاين كتاب كيفكر ليا بلاصتي، و كاين الشيخ ولا الفقيه لي يوريني، وكاين الطبيب لي يقرر ماكلتي إلخ... ماعندي علاش نفكر لراسي اصلا. ماعندي علاش نخدم عقلي، حيث نقدر نطلبهم ولا نخلصهم وهوما يديرو ليا هاد الخدمة الصعيبة .


هادو لي كيمارسو هاد الوصاية هادي بغاو يرجعو گاع البشر يعتقدو أن التفكير في التحرر من سلطتهم مسألة ماشي غير صعيبة ولكن خطيرة. فمن بعد ما كلخو هاد الأوصياء  قطيعهم (بهايمهم) دارو جهدهم باش ماتقدرش حتى بهيمة منهم تفكر بلا بهم، حيث ولاو كيخافو يسيرو بوحدهم (نحو التحرر). واخا راه في الواقع هاد الخوف ماشي صحيح، لأنهم (القطيع) خاصهم يجربو يتمشاو بحدهم ويطيحو ومن بعد عدد من الأخطاء غادي يتعلمو.


صعيب يتحرر الفرد من الوصاية ويبدا يستعمل عقلو حيث محاولش يديرها من قبل. كاينين أفراد قلال لي نجحو يبداو يخدمو عقلهم ويحررو راسهم من العگز.


ولكن ممكن حتى العامة/ الحشود (الناس كاملين)ينورو ريؤسهم وقتما تعطاتهم الفرصة لأن التنوير غاظي يوقع لامحالة. وديما غادي يكونو مفكرون أحرار ومستقلون واخا يكونو ديما الأوصياء.


باش يكون التنوير كيخص غير تكون الحرية فقط. وابسط حاجة يمكن تعنيه الحرية هو أن يكون الفرد حر باش يخدم عقلو بشكل علني في جميع الأشياء. ولكن كنسمعو من جميع الجهات:  الحاكم ماتخدمش عقلك،طبق الأوامر، مول الضريبة:ماتخدمش عقلك، خلص الضريبة. الشيخ والقس أو الفقيه: ماتخدمش عقلك، آمن.


فينما مشينا كنلقاو قيود وحواجز على الحرية. ولكن شنو هي القيود لي كتعيق التنوير؟ وشنو لي ماكتعيقوش؟ كنقول اوديماخاصش يكونو قيود على أن يخدم الإنسان الفرد عقلو ويفكر ويعبر بشكل علني على أفكارو. وهادشي كافي باشي يوقع التنوير. فاش كنقول نعبر على افكاري بشكل علني يعني نشاركها مع المجتمع. هادشي خاصو يستمر حتى يوصل الوعي لجميع الناس.


ماشي مشكل يلا تأجل التنوير عند الفرد واحد المدة، ولكن المشكل هو يلا تمنع التنوير كليا سوا على الجماعات ولا على الأفراد. وكيزيد المشكل يكبر فاش كيتاخد شي حاكم مستبد واحد الدين معين وكيبغي يفرضو على بلقي المواطنين.


فاش كيسولوني واش حنا فعصر متنور؟ كنقول لا. ولكن كنعيشو فعصر التنوير. حيث تال دابا بقاين الأفراد مكيقدروش يخدمو عقولهم في المسائل الدينية بكل ثقة ومنهجية سليمة وبلا توجيه من برا. ولكن كاينة أدلة كتبين أننا غادين فطريق مفتوح نحو حرية نقد الدين، وبلي المعيقات والحواجز لي كتعيق التنوير غاديا كتحيد.


بقيت كنركز بزاف على أن أهم حاجة في التنوير هي : تحرر الفرد من الوصاية لي تفرضات عليه (وهو مسؤول عليها) وخصوصا الوصاية الدينية، لأن الوصاية الدينية ماشي غير كتآدي (مؤدية)، ولكن كتحشم گاع (مخزية وعار). وركزت على أن مصلحة الجميع (الدولة والمجتمع) في تشجيع الفكر الحر لأنه كيعطي فرصة باش يتفاعلو الأنماط الفكرية وهاكا كيكونو الأفراد أكثر قدرة على التصرف بحرية وهكذا مصلحة الدولة يكون مواطن حر وبكرامتو ماشي غير الة وماكينة كتجتر وكتطبق الأوامر.


المقال طويل اختصرتو ونقصت بزاف ديال الأفكار لي عندهم علاقة تاريخيا بدولة بروسيا والحاكم ديالها لي كان عايش فيها كانط.


كنتمنى نكون حافظت على المعنى ديال الكلام ديال كانط، وكنصحكم تقراوها كما هي باللغات لي كتعرفو وقارنو.


المراجع:

http://library.standrews-de.org/lists/CourseGuides/religion/rs-vi/oppressed/kant_what_is_enlightenment.pdf

https://neorevivalism.files.wordpress.com/2015/04/d985d8a7-d987d988-d8a7d984d8aad986d988d98ad8b1-d983d8a7d986d8b7.pdf


http://hekmah.org/%D8%A5%D8%AC%D8%A7%D8%A8%D8%A9-%D8%B9%D9%86-%D8%B3%D8%A4%D8%A7%D9%84-%D9%85%D8%A7-%D9%87%D9%88-%D8%A7%D9%84%D8%AA%D9%86%D9%88%D9%8A%D8%B1%D8%9F-%D8%A5%D9%85%D8%A7%D9%86%D9%88%D9%8A%D9%84-%D9%83/

​شنو هو الفرق بين اليساري واليميني في السياسة؟


شنو هو الفرق بين اليسار واليمين في السياسية؟
http://www.dailyinfographic.com/wp-content/uploads/2012/08/leftright_US_1416.gif

السياسة والمسائل المتعلقة بالحكومة والحكم كيقيسو جميع النواحي ديال حياتنا اليومية، بالتالي غيكون من المفيد تكون عندنا  معلومات عليها وعلى المواضيع لي كدور فنفس المجال. فكرت ندير واحد السلسلة فهاد المجال وقلت بلي أهم واول حاجة خاص أي واحد باغي يفهم السياسة يعرفها ويقدر يتخيل أي خطاب ولا نظام سياسي هويقدر يصنفو واش يمين ولا يسار. 


كما كتعرفو هاد السلسلة (افكار خاصنا كلنا نعرفوها) كتعطي معلومات عامة فقط وموجهة بالاساس للناس العامة. أما لي كيقرا ويبحث راه مايحتاجش لها. قلت هادشي لأن مسألة التصنيفات labeling ماكتعكسش ديما الواقع لأن الواقع معقد بزاف ولكن باش نفهمو التعقيد غادي نبسطوه ونستعلمو هاد القضية ديال التصنيف categorisation ماشي labeling. المهم تقريبا أي إيديولوجية سياسية يمكن نصنفها واش يمين ولا يسار. هاد التصنيفات كتعتمد في الاعلام والتاريخ وحتى في العلوم السياسية. 

https://qph.fs.quoracdn.net/main-qimg-717503c8fd05f96cb46a829cf8b88446-c

إذن شنو هو الفرق بين اليسار واليمين؟ 

مصطلح اليسار واليمين بدا من سنة 1790 في فرنسا (المرجع 1 التحت) في وقت الثورة الفرنسية في مجلس النواب بحيث تقسمو النواب إلى لي جالسين في ليمن ولي جالسين في ليسر. لي على اليمين هما لي مع تبقى الملكية حاكمة  ومايكونش تغيير جذري في نظام الدولة. ولي كانو جالسين على اليسار كانو باغين تغيير يقضي على النظام الملكي وتأسس  جمهورية. (نفس المرجع) وهكذا بقى مصطلح اليسار في السياسة كيوصف الناس لي مع التغيير الراديكالي (الجذري)، ومصطلح اليمين كيوصف الناس المحافظين، لي باغين تبقى الأمور كيف ما هي.


وهكذا مع ظهور الإشتراكية والماركسية بداو لي باغين تقلب الآية ويوليو وسائل الإنتاج فيد المِلكية العامة عوض الملكية الخاصة كيتسماو اليساريين، أما الناس لي بغاو يحافظو على نفس الوضع كيتسماو اليٙمينيين. وهكا بقى المصطلحين كيتداولهم الكتاب والملاحظين ديال مجال السياسة. 

مع أواسط القرن العشرين بداو الماركسيين كيسميو أحزابهم السياسية بكل فخر بسميات فيها "اليسار" وبداو كيحاولو يوصلو افكارهم للمستوى العالمي: كتسمى بالاممية الاشتراكية. وكان اليميني بشكل عام هو أي واحد كان ضد هاد الفكر اليساري. 


فالدول الأخرى كان اليساري هو لي ضد الآثار المدمرة ديال الرأسمالية وكيطالب بمعالجة المشاكل المتعلقة بالبطالة وتوفير تغطية صحية وتكافؤ الفرص في التعليم والوظيفة وغيرها. أما اليمينيين على العموم كيطالبو بأن الدولة تقلل من التدخل ديالها في السوق وتحرر الاقتصاد(العجيب أن اليمينيين كيطالبو أن الحكومة تهز يديها وتحرر السوق وفي نفس الوقت كتطالب منها تفرض قوانين تجريم الحريات الفردية). المهم اليمنيين ديما مع الملكية الخاصة وان دور السلطات هي تحمي نفس القيم والوضع القائم.


التسميات كتختلف. اليساريين كيتسماو حداثيين أو تقدميين. فامريكا كيتسماو Democrats الديمقراطيين واليمنيين كيتسماو الجمهوريون، فالنگليز اليسار كيتسماو ليبراليين (رغم انهم ضد تحرير الاقتصاد ربما ليبراليين لأنهم مع الحريات الفردية لان مفهوم الليبرالية جا من ليبرتي liberté ولكن كيخص تجارة حرة ماشي الحرية الفردية) واليمين محافظين. 


كلما مشينا في اتجاه اليسار كنمشيو لليسار الراديكالي (المتشدد)، وكلما مشينا في اتجاه اليمين كنمشيو لليمن المتشدد. وكلما اقتربنا للوسط كنلقاو تيارات أقل تشددا. المهم فكل أقصى غتلقى تيار لي كيآمن أنه يمكن يهز السلاح باش يدافع على مشروعه السياسي. هاد القضية ربما بدات كتنقص. 


باش نزيدو نفهمو نشوفو التصور ديال اليمين واليسار لأهم المجالات في المجتمع. 

نبداو بدور الحكومة والسياسة الاقتصادية.

اليسار: الحكومة ولا الدولة خاص يملك وسائل الإنتاج وتحكم في الاقتصاد وتقنن السوق حسب مواردها الطبيعية والبشرية. يعني القطاعات بحال التعليم والصحة والنقل خاص تشدهم الدولة وتسيرهم. كيطالبو تكون الضريبة على الثروة والاغنياء وتكون قوانين اقتصادية صارمة.


 اليمين: كيشوفو أن الحكومة والدولة خاصها تخلي السوق حر وماتحكمش فيه، يعني خاص نخوصصو أكبر عدد من القطاعات الاقتصادية ويوليو الشركات هما لي متحكمين. (الرأسمالية). كايطالبو مايكونوش قوانين كثيرة على الاقتصاد ويخليو لي عندو فلوس وقدر يشري ويسثتمر يبالي. 

التغطية الصحية:

اليمين: ماخاصش الدولة دير التغطية الصحية خاص تكلف بها شركات ولي قادر يدير التغطية الصحية يديرها لراسو. كل واحد يداوا على قد جيبو.

اليسار: كيآمن أن الخدمات الصحية حق من حقوق أي مواطن وبالتالي خاص الدولة هي لي توفرها لجميع المواطنين بشكل متساوي.

الهجرة:

 اليسار: الهجرة حق من حقوق الإنسان وحتى لي ماعندوش الوراق من حقو يعيش فأي دولة خصوصا يلا كان قاصر وماعندوش سوابق. خاص نفتحو الحدود ونستافدو من المهاجرين لأنهم كيعاونو الاقتصاد.

اليمين: الهجرة كتأثر على الاقتصاد والمهاجرين كياخدو الوظائف لي غيخدمو فيها ولاد البلاد وبالتالي خاص نزيرو الحدود ونطردو لي ماعندهم الوثائق.


التعليم:

اليمين: ماشي ضد المدرسة العمومية ولكن خوصصة التعليم من الحلول المناسبة لي غادي تزيد بالمدرسة للقدام لأنها كتقدم خدمات أحسن. 

اليسار: المدرسة العمومية هي الحل وخاصها تبقى فابور وتكون فيها الجودة. المدرسة العمومية هي ركيزة أساسية للتنمية. ويلا كان التعليم الخصوصي خاص الدولة تراقبو وتفرض عليه يقري ولاد الفقراء.


الدين

اليسار: الأديان حرية فردية كل واحد حر يختار الدين لي بغى ويخلي الناس يختارو الدين لي بغاو. ماخص الدولة تدعم حتى دين، خاصها تبقى محايدة. وماخصاش تعطي امتيازات لمواطنين​على حساب مواطنين آخرين بناءا على معتقدهم ولا لونهم ولا لغتهم . التلاميذ خاص يتعلمو التفكير النقدي ونخليو لهم حق اختيار المعتقدات لي بغاو. 

اليمين: خاص الدولة ترعى الدين الرسمي ورئيس الدولة هو رئيس الديانة السائدة. وعموما كيطالبو أن الدين يدرس في المدارس ويطبق ولي أهان الدين ولا خرج منو يتحاكم. لأن بالنسبة لهم القوانين الخاصة بالحريات الفردية خاص تكون من الدين. 


الحريات الفردية:

اليمين: الحريات الفردية خاص تدخل فيها الدولة، والاختيارات خاص تفرضهم الدولة. وبالتالي خاصنا نفرضو واحد النمط ديال الاخلاق والسلوك في المدرسة والإعلام. هادشي علاش اليمين بشكل عام ضد العلاقات الرضائية (خارج الزواج) (رغم أنه نقدرو نلقاو أشخاص يمينيين كيديروها)، ضد الإجهاض، ضد المثلية الجنسية، ضد تحديد النسل، مع تعدد الزوجات، ضد تدريس التربية الجنسية، خاص الدولة تفرض اللغة والهوية الوطنية. 


اليسار: ماخصش ​الدولة تدخل في خصوصيات المواطنين، بالتالي المواطن من حقو يختار يدير علاقات مع الشخص لي بغى (يكونو راضيين وعاقلين ماشي قاصر)، الدولة مكتمنعش لي بغات دير الاجهاض (في اطار قانون)، مع تحديد النسل، مع تعليم الأطفال الثقافة الجنسية، مع الاختيارات اللغوية والهوياتية للمواطنين(الانفتاح على لغات وهويات العالم)، المهم مع كل الحريات الدينية والسياسية والاجتماعية. 


مسائل أخرى: 

اليسار: مع حماية البيئة (الأحزاب الخضر)، مع المساواة بين​ الجنسين، مع احترام حقوق الأقليات، ضد الحروب، مع تدريس الفلسفة والتفكير النقدي، مع الإبداع في الفنون دون قيود، مع حرية التعبير والرأي كيفما كان، ضد عقوبة الاعدام، حرية المعتقد، ضد تعدد الزوجات، مع حقوق الاقليات الجنسية والثقافية،  

 اليمين: اليمين فميريكان مثلا مكايآمنوش بمشكل البيئة وكيقولو ان ظاهرة الانحباس الحراري غير هدرة خاوية وانه ماشي سوقنا وماغاديش نقصو من الثلوث. اليمين كيتحفظ على الفنون وكيقول أنه خاص ضوابط أخلاقية يلتزم بها المبدع، الأقليات خاصها تلتزم بضوابط الأغلبية، حرية التعبير في حدود (هناك خطوط حمراء)، المساواة بين الجنسين فيها نظر (في الإرث مثلا)، الفلسفة مادام لا تعارض الدين، ضد تدريس التطور (تغييرو بتدريس "التصميم الذكي")، مع عقوبة الاعدام، ضد الاجهاض والعلاقات الرضائية...


حركات فكرية:

 نشوفو بشكل خاطف بعض الحركات الفكرية لي ظهرات من رحم كل تيار: 


اليمين: الرأسمالية، المكارتية (McCarthyism)واحد الحركة ضد الإشتراكية، بانت فالميريكان، جماعة جون بورش John Birch Society حتى هي من اليمين الراديكالي المتشدد لي ضد الاشتراكية،طالبان التاتشرية Thatcherism نسبة الى مارگاريت تاتشر، كانت رئيسة الوزراء فبريطانيا من حزب المحافظين، الشعبوية اليمينية populism  (تيار ضد النخبوية)، الامبريالية، الوطنية والقومية، التجارة الحرة، الاخوان المسلمين، القطبية، الوهابية، السلفية... 


اليسار: الاشتراكية، الشيوعية، النقابية، البلوريتارية ،  العدالة الاجتماعية، المساواتية egalitarianism، اللاسلطوية anarchy، الديمقراطية، التقدمية، حركات من أجل الحريات المدنية civil rights movements، الحركات النسوية، حركات ضد الحرب، حركات حماية البيئة، دولة العمال، الماركسية، اللينينية، الماوية، حركات تناهضد العولمة، العلمانية، حقوق الإنسان، حقوق المرأة، حقوق الحيوان، الحداثة ومابعد الحداثة السلامية pacifism، ...


المهم الحركات لي يمكن تنضوي تحت كل تيار من هاد التيارت كثار وكل حركة ذكرناها عليها نقاش كبير وكل حركة فيها تيارات كثار ومايمكنش نهضرو عليهم هنا. من الحوايج لي نقدرو نشيرو لها هي أن الأحزاب السياسية لي محسوبين على اليمين في دول الشمال خصوصا في أوروبا دارو تراجعات كبيرة وولاو كيقبلو عدد من الأشياء لي خاصة الحريات الفردية مثلا ولاو مركزين غير على الجانب الاقتصادي. مثلا فبريطانيا (حتى فدول أخرى)حزب المحافظين لي من اليمين قبل زواج المثليين وهادي من الحريات الفردية لي اليمينيين ضدها في أغلب الأحيان والأماكن. 


نشوفو دابا بعض المنظمات والهيئات والأحزاب لي يمكن نصنفوها تحت كل جناح wing. 


اليمين: في المغرب: حزب الاستقلال، حزب العدالة والتنمية، الاتحاد الدستوري، العدل والإحسان، التوحيد والإصلاح، حزب النهضة والفضيلة، دول اخرى: حركة النهضة الإسلامية (الجزاير)، حركة حماس (فلسطين)، حزب الحرية والعدالة (مصر)، حزب النور (مصر)، الحزب الديمقراطي المسيحي (فرنسا)، الجبهة الوطنية ديال مارين لوبان  (فرنسا)، الحزب الجمهوري GOP (الميريكان)، حزب المحافظين البريطاني، حزب حركة النهضة (تونس)، حزب الشعب (اسبانيا)...


اليسار: النهج الديمقراطي (المغرب)، الحزب الاشتراكي الموحد (المغرب)، حزب الطليعة الديمقراطي الاشتراكي (المغرب)، الجمعية المغربية لحقوق الإنسان، أطاك المغرب ، حركة مالي (المغرب)، الاتحاد الاشتراكي (المغرب)، منظمة​التحرير الفلسطينية، الحزب الشيوعي الجزائري، الحزب المصري الديمقراطي الاجتماعي، الحزب الاشتراكي المصري، فرنسا الأبية la France insoumise، حركة جميعا (Ensemble) بفرنسا، حزب العمال البريطاني، الحزب الديموقراطي الامريكي، حركة نداء تونس، حزب Unidos Podemosمتحدين نستطيع (اسبانيا)...


شخصيات معروفة من كل تيار عبر العالم.

 اليمين: جورج بوش، جون مكاين، دونالد ترامب،جون مارين لوبان، تيريزا ماي، ادولف هتلر، دايفيد كاميرون، رونالد ريگن، مارگاريت تاتشر، فرانسيسكو فرانكو، بينيتو موسوليني، أسامة بن لادن، مصعب الزرقاوي،  محمد مورسي، عبد الإله بنكيران، عبد السلام ياسين، سيد قطب، الخمايني، الفيزازي، حسن البنا،  أيمن الظواهري، علال الفاسي، يوسف القرضاوي، زغلول النجار، أحمد الريسوني...


اليسار: كارل ماركس، تشي جيفارا، فلاديمير لينين، ماوتسي تونغ، فيديل كاسترو، ليون تروتسكي، جورج اورويل، البرت اينشتاين، بيرتراند راسل، پابلو بيكاسو، مارتن لوتر كينغ جينور، بيرني ساندرز، نعام تشومسكي، تشارلي تشابلن، باراك أوباما، هوغو تشافيز، تيودور ادورنو، جمال عبد الناصر، الحبيب بورقيبة، عبد الرحمن اليوسفي، بن سعيد ايت يدر،  نبيلة مونيب، محمد عابد الجابري، كارل ساغان، عبد الرحيم بوعبيد، شكري بلعيد، المهدي بن بركة، علي يعتة، ايت الجيد بنعيسى، سعيدة المنبهي، عمر بن جلون، أحمد عصيد ...


المهم الموضوع ماشي سهل، نتمنى يكون ارضية لكم وتعاودو تبحثو فيه... 

https://cdn-images-1.medium.com/max/620/1*sCSTjEbiNb67uWzDOHbP4A.png

فين كتصنفو راسكم وعلاش؟ 


  ماتنساوش تبعوني فلفايسبوك  وبارتاجيو مع ناس خرين
 https://www.facebook.com/abaddoucom


المراجع:

  1. Rodney P Carlisle. Encyclopedia of Politics: The Left and the Right. Vol 2. 2005
  2. https://www.diffen.com/difference/Left_Wing_vs_Right_Wing
  3. https://en.wikipedia.org/wiki/Right-wing_politics
  4. https://en.wikipedia.org/wiki/Left-wing_politics
  5. https://www.quora.com/What-is-the-difference-between-the-left-wing-and-the-right-wing-What-is-the-difference-on-a-basic-level-and-on-a-hardcore-politician-level
  6. https://en.wikipedia.org/wiki/Left%E2%80%93right_political_spectrum

شنو نقدرو نتعلمو من اللغات؟؟

شنو نقدرو نتعلمو من اللغات /اللغويات؟؟


اللغة من المنتوجات الإنسانية العجيبة ولي كتعكس في تعقيدها التعقيدات​ الموجودة في الطبيعة الإنسانية. شنو نقدرو نتعلمو من اللغات ؟ اللغات بطبعها ماشي زاگية/ثابتة، بالعكس هي كتطور بحال أي كائن حي. كتزاد وكتكبر وكتشرف وكتولد وتموت. كما كاينة شجرة تطورية ديال الكائنات الحية كاينة شجرة تطورية ديال اللغات، بحيث كنقدرو نتبعو اي لغة ونعرفو اصلها وعائلتها الكبيرة والصغيرة. غير أن المشكل في اللغات أعقد من الكائنات الحية حيث اللغة ماعندهاش الخبر الوراثي وماعندهاش الحفريات لي نقدرو ندرسوها. المهم لي خصنا نعرفوه هو أنه كاين علم كيدرس اللغات بشكل علمي و أنه كاين تنوع لغوي كبير بزاف ومثير للاهتمام. شنو نقدرو نتعلمو من هاد التنوع؟


حنا فاش كنكبرو فواحد الثقافة وفي وسط لغوي لي غالبا كتكون فيه لغة وحدة كترسخ فعقولنا معايير normes باش نبداو نشوفو أي حاجة ونصنفوها على أساس  واش هي عادية normal او غير عادية​ anormal. هاد المعايير كتسرب للدماغنا بلا مكنعرفو وكنوليو نحكمو على الأشياء انطلاقا من الثقافة لي كبرنا فيها واللغة لي عرفنا بها العالم. هاد normes هما لي كيخليوك تعرف أن كلمات معينة ماخصهاش تقال في الدار او في المسجد، وكتخليك تعرف واش هاد اللبسة مقبولة ولا مامقبولاش في العرس مثلا.


المهم  من هادشي كولو هو أننا فاش كنكتسبو اللغة الأم كتولي بحال واحد القالب moule في دمغنا وكتولي هي المعيار ديالنا ملي نتصادفو مع لغات أخرى كنعبروها (كنقيسوها من القياس) بديك اللغة الاولى لي تعلمنا وكتخلينا نحكمو على اللغات الاخرى ونبداو نصنفوها من خلال المعايير لي تلقيناها في اللغة الاولى. نفس الشيء يمكن يتقال على الثقافة الاصلية ديالنا بحيث كتولي هي المرجع وهي باش كنحكمو على الثقافات الأخرى. هذا عائق مكايخليناش نكتشفو اللغة/الثقافة الأخرى بشكل موضوعي. 


فاش كنبداو نتعلمو شي لغة جديدة ديما كنتصدمو فاش كنكتشفو شي حوايج مختلفة بزاف على اللغة لي كبرنا بها! مثلا ملي كتكتشف أن اللغة الألمانية، الى جانب المذكر و المؤنث، فيها المحايد Neuter والأغرب أنه مكايناش قاعدة كتبين فوقاش الإسم غيكون محايد او مؤنث. فممكن واحد الكلمة تعلمناها في لغتنا الأم تكون مؤنث واللغات الأخرى لي نتعلمو نلقاوها مذكر أو محايد. كما أنه غتلقى كلمات في لغات ماعندهمش الجمع أو المفرد. غتلقى لغات مافيهمش أو فيهم عدد من المظاهر لي أساسية في لغتك الأم. غتكتشف مثلا أن اللغة ديال السكان الأصليين فجزيرة تاسمانيا (نواحي استراليا) أنهم مافيهاش الاعداد (عندهم Parmery لي كتعني 1 و calabawa لي هي 2 و cardia لي هي بزااف). في لغة أخرى فقبائل Guarani في البرازيل عندهم من 1 تال 4 صافي (من كتاب قصة الحضارة ديال ويل ديورنت  will Durant المجلد الاول). 


باختصار، لي نقدرو نتعلموه من اللغات هو أن العالم لي كبرنا فيه وكنشوفوه هو الصحيح و هو الوحيد لي كاين، ماشي صحيح وماشي غير هو لي كاين. بالتالي خاص نكونو واجدين نقبلو أي حاجة كما كانت بدون مانقيسوها على المول moule لي كبرنا فيه. نحاولو نعطيو المسافة و نعطيو الوقت لراسنا قبل مانحكمو على الأشياء. هاد العملية فاش كتقال كتبان سهلة ولكن كتبغي ندربو عليها. ونخليوها تكون هي القالب الوحيد فدماغنا. 


حاجة اخرى، نقدرو نتعلمو مانحگروش لغتنا ولهجتنا ولكنتنا accent، لأنها غير تمظهر واحد من تمظهرات التطورات لي كتوقع للغة. يلا تزاديتي فواحد المنطقة لي المناطق الأخرى كيسخرو من أسلوب نطق بعض الكلمات أو بعض الأصوات. سواء السين مكان الشين أو الكاف مكان الشين (كاينة امثلة كثيرة وفي أي لغة)، فهادي مسألة مكاتزيد مكتنقص من قيمتك نتا ولا منطقتهم. بالعكس كتغني الشكل التطوري للغات.  فلو كانت لغة منطقتك هي لي قوية اقتصاديا وسياسيا كان العكس هو لي غيوقع: غيكون الشكل اللغوي ديالك هو لي نورمال و هو لي خاص الجميع يقلدو، وغادي يسخرو من الأشكال اللغوية الأخرى لي عند ناس أقل نفوذا إقتصاديا و سياسيا. يعني اللغة في حد داتها ماكتحمل لا قيمة إيجابية ولا سلبية. 


الإنسان عبر السنين عاونو التعلم من بعضو البعض باش يستمر في الحياة ويتطور عبر الزمن. هذا شيء ايجابي، طوروه أسلافنا وقدرو يتفوقو فيه على الكائنات الأخرى. مع الأسف، الغالبية العظمى من الناس كينقلو من الآخرين بلا مايخدمو عقولهم، وبعض المرات كتوقع مأساة بسبب أننا كنقلو من الغير بلا مانعيدو النظر فدوك المعايير. واللغات كتعلمنا أننا خاص نتخلصو من الحوايج لي كنعتابروها نورمال فلغتنا، لأنها تقدر ماتكونش نورمال فاللغات الأخرى. ومع الأسف، كما قال البير كامو، بزااف ديال الناس كيتقاتلو غير باش يكونو نورمال. باش يتوافقو ويتطابقو مع المعايير les normes، في الوقت لي خاص يكسرو هاد المعايير. 


هاد الموضوع فايت تنشر فمجلة "بوكوغرام" الفايسبوكية

شنو خاصني نعرف على الهندوسية ؟


قبل 4500 سنة ضهرات واحد الحضارة متقدمة في المنطقة لي كاتسمى دابا الهند، هاد الحضارة سميتها حضارة وادي السند Indus Valley Civilisation، أقدم حضارة حضرية في شبه الجزيرة الهندية. و كان اسم "الهندوس" يطلق على سكان هاد الحضارة نسبة إلى كلمة إندوس Indus (النهر لي تكلمنا عليه) خصوصا من طرف الفرس و الاغريق،  هاد السكان  كانت عندهم ديانات ومعتقدات مختلفة و كلها تجمعات تحت كلمة "الهندوسية"، الهندوسية طبعا تطورت مع الزمن ولكن جدورها واصولها كترجع لهاد الحضارة لي دكرنا. طبعا كلمة "الهندوسية" جديدة ولكن الديانة ولاّ مجموعة المعتقدات لي كتطلق عليها هاد السمية قديمة بزاف. الهندوسية هي أقدم ديانة مزالة حية على الارض.


الهندوسية من الديانات الكبرى في العالم حسب عدد المؤمنين بها(مليار مؤمن)، هي الرابعة من بعد كل من المسيحية (2.2 مليار) و الاسلام (مليار و600مليون) و اللادينية (مليار و 100 مليون) (الأرقام من معهد Pew الاحصائيات 2012). الهندوسية كاينة في العالم كولو ولكن 80℅ ديال السكان في الهند هندوس.

الهندوسية واحد الديانة لي ماشي ساهلة لواحد من خارج الهندوسية يتكلم عليها، إلى قريتي أي كتاب على الهندوسية تايقولك بلي الهندوسية ماشي ديانة بالمفهوم التقليدي للديانة. هي ماعندهاش رسول او نبي بحال الاسلام او اليهودية مثلا، و الكتاب المقدس عندهم ماكاينش كتاب واحد، و ماشي كتاب بالمعنى المألوف عن القرآن أو كنزا ربا (ديال الصابئة المندائية). حتى الإله عندهم صعيب يتحدد، بل في الهندوسية داخلها فيها نقاش ديال واش الإله واحد ولا متعدد، لدرجة أن، كما كيقول Sen K. M ، الهندوسية تقدر تجمع فيها ناس يختلفون جدا من حيث المعتقد، يقدر يكونو مؤمنون جدا الى درجة التعصب و في نفس الان تتلقى ناس هندوس يشككون في كل شيء بل لا يؤمنون أصلا و هادشي داخل الهندوسية. بتعبير آخر الهندوسية ديانة تعددية تقبل جميع التيارات و المذاهب لانها تتركز على أهمية أن الفرد هو لي يوصل للحقيقة ولو كان هاد الحقيقة أنه يشكك في كل التراث الهندوسي.




الهندوسية تترتكز على واحد مجموعة ديال النصوص المقدسة لي كتسمى الڤيدا  Vedas (sديال الجمع)، و هاد النصوص في الاصل كانت باللغة السانسكريتية Sanskrit و لي كتعرني المعرفة، و هي عبارة عن قصائد و أشعار كانت في البداية شفوية و عبر آلاف السنوات دازت من جيل لجيل شفهيا، وفي الأخير تكتبات. هاد النصوص هي المركز ديال الفلسفة ولا الديانة الهندوسية. حيث تانلقاو اوبانيشاد Upanishads و پورانا Puranas و ماهاباراتا Mahabharata و رامانايا Ramayana، هادو كلهم كتب ونصوص كترتاكز عليهم الهندوسية بحيث فيهم قصص و أشعار مقدسة و ملهمة للهندوس. في الحقيقة كاين كتب كثيرة و طويلة بزاف مايمكنش نتكلم عليها لأن غير غير ماهاباراتا بوحدها فيها 6 دالكتوبا و الباهاغافاد Bhagavad-Gita گيتا جزء من ماهاباراتا فيه 18 فصل و 700 بيت (دكرت هادا لأنه هو الاشهر).


البوذية و الجانية و السيخية كلها ديانات انبتقات من الهندوسية وكلها تفسيرات مختلفة للتراث الهندوسي العريق.


اهم حاجة عند الهندوس هي أن الحقيقة المثلى تتمثل في براهمان Brahman لي نقدرو نعتبروه هو الإله الأسمى و المطلق الواحد، لي هو أقدس حاجة في الكون عندهم. وهاد براهمان أبدي و خالد و تقريبا فيه جميع الصفات لي في الالهة ديال الديانات التوحيدية، و لكن القدسية ديال براهمان حاضرة في كل الكائنات الحية الموجودة بحيث هو الخالق و هو لي ضامن استمرار الحياة (العناية) و هو لي يقدر يدي الحياة (ينهي العالم). وهاد الحوايج 3، الخلق و العناية و حل العالم كتعتبر بحال واحد الثالوث لي فيه براهماBrahma(ماشي براهمان)، ڤيشنوVishnu و شيڤا Shiva. يعني في الحقيقة الهندوسية هي ديانة توحيدية لأنه كاين براهمان الخالق الغير مخلوق و الآلهة الاخرى غير تجليات ديالو.


الهندوسية كتسمح بتعدد تصور و فهم الإله براهمان بحيث كاين لي تايقون أن براهمان ماعندو حتى شي شكل ولا صورة ولا مثال، هو لا نهائي ولا يُتصور، في حين كاين لي تايقول بلي برهمان يقدر ياخد أشكال متعددة و صور مختلفة، و في نفس الوقت كاين لي تايقول بلي أكبر شكل لبراهمان هو كريشنا و كاين لي تايقول بلي هو شيفا.

هادشي كلام قليل في حق الهندوسية نتمى تكون انطلاقة باش تقراو عليها لأنها مثيرة للاهتمام.

المراجع: 
الموسوعة بريتانيكا Britanica
https://www.britannica.com/topic/Hinduism/Hinduism-and-Islam
Hinduism 101: The Basics
https://www.hafsite.org/sites/default/files/Hinduism101TheBasics_1.pdf
Hinduism by Sen K. M.

https://en.wikipedia.org/wiki/List_of_religious_populations

https://ar.wikipedia.org/wiki/%D8%A7%D9%84%D8%A8%D9%87%D8%A7%D8%BA%D8%A7%D9%81%D8%A7%D8%AF_%D8%BA%D9%8A%D8%AA%D8%A7

http://www.harekrsna.com/philosophy/incarnations/trimurti.gif
http://blogimages.indianroots.com/wp-content/uploads/2014/07/Suryaprajnapati_Sutra.jpg

شكون هما فلاسفة قبل سقراط؟ 3 --اناكسيمانس




آخر فيلسوف في المدرسة الميليسية (من بعد طاليس و أناكسيماندر) هو انيكسيمانس Anaximenes وهو أقل تأثير و أهمية من أناكسيماندر ولكن دار واحد دفعة جديدة في التفكير. سنوات الميلاد والوفاة ديالو مامأكداش ولكن معروف أنه جا من بعد أناكسيماندر، و لابد أنه كان قبل من عام 494 قبل الميلاد حيث المدينة ديال ميلاطوس Miletus غادي اهدموها الفرس فهاداك العام. للاسف ملي غادي تعاود تبنى هاد المدينة غادي تولي معروفة بتجارة الصوف ماشي بالفلسفة.



المهم في إطار السؤال لي كانو هاد الفلاسفة بثلاثة تايحاولو إجاوبو عليه ديال منين جا العالم و منين جينا حنا اعني بشكل فلسفي/علمي، قلنا أن طاليس قال هادشي كولو جا من الماء و قلنا أن اناكسيماندر قال جا من شي مادة مامعروفاش سماها أبيرون لي تاتتعني "مجهول"، جا عمي اناكسيمانس قال المادة الأولى الأساسية لي جا منها العالم هي الهواء. قاليك الروح من الهواء. النار هواء، وحتى الماء راه هواء مركز و مكدس، قال أنه إلى زاد الهواء تكركز و تكدس أكثر غادي اولي تربة و إلى زاد تكدس وتركز غايولي صخور. هكذا تايفسر أن اصل كلشي هو الهواء و مع الضغط تايتغير و تايعطي عناصر أخرى.  

   

كان تايظن أن الارض دايرة بحال شي طاولة مستديرة ، و أن الهواء هو لي تايحيط بها وبكلشي. قال أنه كيفما الروح (كان كايآمن بأنه كاين الروح و الجسد-هادي فكرة كانت موجودة حتى عند المصريين القدمى و الهندوس و باقي) لي هو هواء جامع الجسد، حتى الأرض داير بها الهواء. 


كانو المفكرين القدامى تايشوفو ان اناكسيمانس هو "اعظم الملطيين الثلاثة". كان اناكسيمانس صغير من اناكسيماندر ب25 عام (على حساب كتاب حلم العقل ديال أنتوني جوتليب) وكانو تايشوفو انه هو اخر نتاج فكري وصلو الانسان فديك ساعة. ولكن المفكرين المحدثون تايشوفو ان اناكسيماندر اكثر متعة واوسع خيالا من اناكسيمانس. تايشوفو انه رجع شوية بالتفكير للور عوض إيزيد به للقدام. مثلا رجع لفكرة طاليس انه كاينة مادة اساسية وحدة لي مخلوق منها كولشي (غير طاليس تايقول أن هاد المادة هي الماء واناكسيمانس تايقول هي الهواء) فلوقت لي تجاوز اناكسماندر هاد الفكرة. 


هاد المدرسة ديال ملطية كانت مهما بزاف فنظر المؤرخين ديال الفلسفة ماشي غير بالافكار لي جات بها ولكن بالمنهج لي حاولات تشوف به العالم. طبعا كما قلنا كان واحد الدور مهم للحضارات لاخرين لي كانو بجنب اليونان بحال مصر وبابل. الاسئلة لي طرحو هاد الناس كانت اسئلة رائعة، الاجوبة لي قدمو حتى هي كانت رائعة ولكن الاهم هو الالهام لي غرسوه في اليونانيون لي غادي إيجيو من بعدهم، حيث هاد العدوى لفكرية غادي تنتاقل من ملطية لمدن خرين تابعين للونان نيت ديك ساعة ولي دابا كاينة في جنوب إيطاليا. واخا هاد التفكير غادي يكون فيه تفسيرات دينية (الديانة الارفية) ولكن غادي تكون مهمة وممتعة واخا انها (حسب راسل) اقل علمية من لي كانت فملطية. 




    الى عجبك الموضوع بارتاجي مع الاصدقاء ديالك

    باش إوصلك الموضوع المقبل دخل لاباج فلفايس

    https://www.facebook.com/abaddoucom


    المراجع: تاريخ الفلسفة الغربية ديال برتراند راسلعالم صوفي ديال جوستاين غاردرحلم العقل ديال أنتوني جوتليب (لي بغا اقراه إيكليكي عليه )

    انا و "لافاك" 2


    فاش تسالات 2015 خرجات واحد اللائحة ديال الجامعات و الترتيب ديالها في العالم، طبعا كمغربي قلبت على الجامعات المغربية فيها، المفاجأة لقيت أنها ماكايناش، أصلا كنت عارف ما يمكنش تكون في الالف الاولى في العالم، ولكن لقيتها ما داخلاش أصلا. إعني ما فيهاش حتى معيار من المعايير لي خاص إكون في الجامعة باش تكون جامعة، من بعد عرفت بلي الجامعات في المغرب دايرين لائحة بوحدهوم. المهم لا علاقة بالعالم. 

    نشوفو هاد المعايير و نشوفو يا كما ظلمو لينا الجامعات دياولنا، كاينين 6 ديال المعايير: اول واحد هو السمعة الاكاديمية (40٪ من اجمالي النقطة) تا يشوفو فيه أحسن الاعمال الاكاديمية لي قدماتها الجامعة و تا ينقطو عليها، المهم بالنسبة ليا طبيعي ما يكونش المغرب فهاد اللائحة حيت، الجامعة لي ما تتقدمش أعمال علمية وأدبية بحالها بحال المدرسة، و إمكن المدرسة أحسن، على الاقل المدرسة تاتعلم القراءة و الكتابة. الجامعة لي مافيها لا مختبرات لا مكتبات ماعندها ما تنتج. على ذكر المكتبات، حسن ليا الشرف زرت واحد الجامعة فرنسية فواحد المدينة لي ماشي كبيرة بزاف (على الفكرة أغلب الجامعات الفرنسية في هاد الترتيب جاو تحت 137الرتبة-  من غير 2)، أول حاجة، فهاد الجامعة كل شعبة عندها مكتبة ديالها، وعاد كاينة المكتبة الكبيرة ديال الجامعة، و عاد كاينين المكتبات ديال المدينة مجانية. ملي تانقول مكتبة راها مكتبة بالمعنى عندهم ماشي عندنا: تادخل و تاتقلب الكتب بيديك وتقرا و تبحث في الحاسوب سواء كنتي طالب ولا لا. 

    المهم نتوما عارفين حالة المكتبات ديال لافاك ديالنا. اولا قليل فاش تلقى الكتاب لي بغيتي، هادشي إلى لقيتيها مفتوحة أصلا. ثاني حاجة، الناس لي تا يخدمو فهاد المكتبات لا علاقة بالكتب و القراءة بحيث أول حاجة تايخنزر فيك تتكره القراية والكتب. مع الكرياج لي تايكون بينك و بينو تاتحس براسك محكور واخا هكاك تاتسناه حتى إرجع وإقولك هاد الكتاب خارج. إذا طبيعي مادام المكتبة لي هي أقل حاجة خاص إستفذ منها الباحث و الطالب ماكايناش باش غادي انتج لينا هاد السمعة الاكاديمية. 

    في الجامعات لي في المراتب الاولى دايرة البحث العلمي أهم حاجة فيها، وأول حاجة تايركزو إكتاسبها الطالب هي كيفاش إدير بحث جيد. حنا آخر حاجة هي كيفاش دير بحث، وللاسف فاقد الشيء لايعطيه، هاد الشخص لي خاصو إعلمك دير بحث ماتايديرش بحوث! شي عام هادا كانت واحد الجريدة مغربية كتبات أن يلاه ١٪ من الجامعيين هما لي تايديرو البحث و تايصدرو إصدارات. إعني هاد المعيار منصف و مايمكنش تكون شي جامعة من المغرب فهاد اللائحة بناءا على هاد المعيار الاول. 

    المعيار الثاني مبني على السمعة ديال الجامعة عند القطاع المهني، إعني في سوق الشغل. تايسولو سوق الشغل شنو هي الجامعة لي تايتخرجو منها أحسن الاطر، المهم هاد القضية باينة ماكايناش عندنا. أصلا كاين فرق كبيرة بين داكشي لي تايتقرا عندنا في الجامعات وداكشي لي مطلوب فسوق الشغل. إعني الجامعة تتنتج أطر تايشدو ديبلومات و نهار إفكر إخدم خاصو إدير ديبلومات آخرين إخدم بهم. زيد على هادشي النزاهة لي عندنا كثيرة في إختيار الاطر بناءا على الكفاءات لي عندو. 

    المعيار الاخر هو نسبة العاملين في الجامعة مع نسبة الطلبة، إعني واش كاين واحد التناسب بين عدد الطلبة والعاملين، نتوما شايفين العدد ديال الطلبة لي تايكونو فالمدرجات ديالنا وربما شفتو صور من الجامعات الامريكية والاروبية. والاهم هو العاملين، حيت أصلا عندنا عاملين أخطبوتين تايبغيو إديرو كولشي، تاتلقاه تايقري الاعلاميات و الفرنسية والرياضيات ومكلف بالعلاقات مع الجامعات الاخرى و مكلف بالموارد البشرية و اللائحة طويلة. المهم مخلص فهاد المهام كلها و ماتايدير حتى وحدة كما يجب...

    يتبع​

    شكون هما فلاسفة قبل سقراط؟ 2--اناكسيماندر Anaximander



    ثاني فيلسوف مورا طاليس هو اناكسيماندر Anaximander؛ كما قلنا، اناكسيماندر أكثر متعة و أهمية من طاليس. التواريخ ديال الميلاد و الوفاة مامعروفاش بشكل دقيق، ولكن تايتقال أنه كان فعمرو 64 فسنة 546 قبل الميلاد. وتايقول راسل أن هاد التاريخ قريب للحقيقة. فالوقت لي طاليس قال أن كولشي مصنوع من الماء، اناكسيماندر تايقول أن أصل جميع الأشياء هو واحد المادة أولية وأساسية ولكن هاد المادة الوحيدة ماشي هي الماء كما قال طاليس، هاد المادة ماشي شي مادة لي تانعرفوها؛ هي واحد المادة لي أولا مجهولة، مامعروفاش، ثانيا، أبدية ولا أزلية، إعني كاينة ديما وماعندهاش واحد العمر. وكاينة في جميع العوالم Worlds حيت بالنسبة لاناكسيمندر هاد العالم ديالنا غير واحد العالم من بزاف ديال العوالم. وتايقول أن هاد المادة الأولية تغيرات وتطورات إلى هاد الحوايج لي تانشوفو ولي تانعرفو و هادي براسها تغيرات و ولات حوايج أخرى وهاكدا شي تاينتج من شي مع مورور الزمن ولكن الأساس هو ديك المادة الأولىولي سماها Apeiron ولي تتعني للامحدود او اللانهائي.

     
    wikipedia

    الدليل لي كان اناكسيماندر تايعطي باش إبين أن المادة الأساسية لي منها تصاوب الكون ماشي الماء ولا أي مادة أخرى معروفة (بحال الماء، التراب ..) هو أنه كون كان الأصل هو شي مادة من هاد المواد المعروفة كانت غادي تسيطر على المواد الأخرى وماتخليش التوازن لي تانشوفو. الماء فازك، مبلل؛ الهواء بارد؛ و النار ساخنة. ولو كان شي واحد منهم هو الاصلي كان غادي إسيطر على الآخرين ومايكونوش أصلا. وهاكدا استخلص أن المادة الأساسية خاصها تكون محايدة. 


    من الافكار المبهرة ديال اناكسيمندر هي أنه كاين واحد الحركة دائمة وأبدية وهي لي جابت وتطور منها العالم ديالنا والعوالم الخرى؛ هاد العوالم فنظرو ماشي تخلقات في لحظة واحدة، بحال كما في بعض  الأديان، ولكن تطورات عبر الزمن. فنظرو التطور هو لي جاب التنوع لي تانشوفو في العالم ديالنا وخصوصا النباتات والحيوانات. هاد الكائنات الحية كلها نتجات وناضت من الفزوكية، البلل (الماء). وفنظارو الإنسان حتى هو بحال الكائنات الأخرى تطور. و تايقول أن الإنسان أصله سمكة. وقال أن الإنسان لابد مايكون تطور من شي حيوان من نوع مختلف لأنه نظرا لطول المدة لي تايبقى فيها طفل ضعيف مايمكنش إنجى.   



    تايتقال انه هو اول واحد رسم خريطة. ويكيپيديا دايرين واحد رسم تقريبي ديال الخريطة لي رسم. 

    wikipedia 
               

    أفكار أناكسيمندر عجيبة صراحة لأن الإنسان لحد الساعة مازال ماتجاوزهاش. كان تايقول أن شكل الارض أسطواني بحال شي أسطوانة Cylinder (شكل رياضي -شوف الصورة )؛ وكان تايقول أن ربما الارض قدها قد الشمس ولا ربما الشمس أكبر من الأرض شي 27 ولا 28 مرة.

    هاد الرسم من هاد الموقع http://homework.uoregon.edu/pub/class/phys361/aristarchus.html

    شفنا أن الأفكار ديال أناكسيمندر كلها جديدة ومبنية بشكل عقلي ومنطقي وعلمي وأغلب الأفكار ديالو مازال تاتناقش في العلم و في الفلسفة. مثلا فكرة العوالم المتعددة، كاينة دابا نظرية علمية تاتتسمى نظرية الأكوان المتعددة Multiverse Theory ولا Meta-universe theory. هاد النظرية لي هي افتراض تايقول أن الكون ديالنا ماهو إلا واحد من عدد لا نهائي ديال الأكوان. هاد الفكرة مازال فيها جدل كبير في واحد العدد كبير من المجالات و مايمكنش نختصرو في هاد الفقرة.


    الفكرة ديال التطور لي هضر عليها أناكسيمندر حتى هي تقريبا تحسمات في العلم مع تشارلز داروين في منتصف القرن19 ولي تاتفسر التنوع لي كاين ديال الكائنات الحية. كاين بزاف ديال الناس ضد هاد الفكرة ماشي لأسباب علمية بالأساس ولكن لأسباب دينية. قلنا أن أناكسيمندر قال أن أصل الإنسان سمكة ومن العجائب أن البولوجي والباليونتولوجي  (عالم الأحياء القديمة) الأمريكي نيل شوبين Neil Shubin إنطلاقا من واحد الاكتشاف ديال واحد المستحاتة ديال واحد السمكةTiktaalik (الصورة) لي انقرضات هادي 375 مليون عام ولي هي واحد من الحلقات التطورية لي تتوضح الانتقال لي وقع في الكائنات الحية من السمك إلى البرمائيات. المهم هاد العالم كتب واحد الكتابفي 2008 سميتو Your Inner Fish السمكة بداخلك. وفيه تايوصف كيفاش تم الانتقال من الأسماك للإنسان. هادا موضوع يستحق نقاش طويل. شوفو الوثائقيhttp://www.dailymotion.com/video/x21evv8_your-inner-fish_news.

    wikipedia


    المهم لاحظتو كيفاش أن أناكسيمندر باقي عايش معانا واخا مات وباقين أفكارو لحد الساعة مهمة. فالموضوع المقبل غادي نهضرو على آخر فيلسوف في المدرسة الملطية/الميليسية لي هو اناكسيمانس.
    إلى عجبكم الموضوع شاركوه مع صحابكم. وباش اوصلكم الموضوع المقبل دخلو للصفحة.

    https://www.facebook.com/abaddoucom/


    المراجع:
    A History of Western Philosophy. Bertrand Russell.http://www.dailymotion.com/video/x21evv8_your-inner-fish_news(Wikipedia (English